Հունաստանը որպես Եվրամիության հնագույն անդամներից մեկը, նոր նախաձեռնությամբ է հանդես եկել, որով ցանկանում է արագացնել բալկանյան երկրների, ինչպես նաեւ Թուրքիայի ԵՄ անդամակցության գործընթացը: Այս մասին նոյեմբերի 24-ին Աթենքում հայտարարել է Հունաստանի ԱԳՆ պաշտոնական ներկայացուցիչ Գրիգորիս Դելավեկուրասը, հաղորդում է «ՌԻԱ նովոստին»:
Նրա խոսքով, Հունաստանն առաջարկում է մեկ տարվա ընթացքում ԵՄ-Թուրքիա գագաթաժողով անցկացնել, որտեղ հնարավոր կլինի վերակենդանացնել Թուրքիայի ԵՄ անդամակցության գործընթացը եւ հաղթահարել այդ ճանապարհին Անկարայի առջեւ ծառացած խոչընդոտները: Ինչ վերաբերում է բալկանյան երկրներին, Աթենքը ցանկանում է 2014-ին կազմակերպել ԵՄ-Արեւմտյան Բալկաններ գագաթաժողով, որպեսզի նոր դինամիկա հաղորդվի այդ երկրների ԵՄ անդամակցության գործընթացին:
Հույն դիվանագետի ներկայացմամբ` այդ ճանապարհին Թուրքիային խանգարում է իրականացվող բարեփոխումների դանդաղ տեմպը եւ անորոշությունը` ԵՄ լիիրավ անդամակցության հնարավորության հետ կապված:
Դելավեկուրասը նաեւ նկատել է, որ Թուրքիան չի կատարում իր ստանձնած պարտավորությունների մի մասը, մասնավորապես, կապված Կիպրոսի խնդրի հետ: Անկարան չի ճանաչում Կիպրոսի կառավարությանը:
Հունաստանի եւ Թուրքիայի միջեւ պահպանվում են մի շարք լուրջ հակասություններ, ներառյալ Կիպրոսի խնդիրը, Էգեյան ծովում առկա հակասությունները եւ այլն: Մինչեւ վերջերս այս երկրները միմյանց համարում էին հնարավոր ռազմական հակառակորդներ, սակայն վերջերս նրանց հարաբերությունները բարելավվել են:
Հունաստանը կողմ են Թուրքիայի ԵՄ անդամակցությանը, պայմանով, որ Թուրքիան բարելավի իր հարաբերությունները Կիպրոսի հետ: Սրանով, Թուրքիան առավելություն կստանա ԵՄ անդամակցության ճանապարհին, իսկ Հունաստանը` կայունություն իր սահմաններին եւ փոխշահավետ համագործակցություն իր արեւելյան հարեւանի հետ:
Հիշեցնենք, որ Թուրքիայի ԵՄ անդամակցության հարցում խոչընդոտ է նաեւ այդ երկրի կողմից Հայոց ցեղասպանությունը ճանաչելու հարցը: