Բլոգեր Ալեքսանդր Լապշինի ձերբակալության եւ Ադրբեջանին արտահանձնելու վերաբերյալ միջազգային հանրության կողմից պատշաճ արձագանքի պակասն է ոգեշնչել Բաքվին: Այդ մասին Twitter-ի իր միկրոբլոգում գրել է Հայաստանի Հանրապետության արտգործնախարարության մամուլի խոսնակ Տիգրան Բալայանը՝ արձագանքելով Վրաստանում բնակվող Ադրբեջանի քաղաքացիների առեւանգման եւ անօրինական ձերբակալման մասին հաղորդագրությունների վերաբերյալ ԵՄ Արտաքին գործերի եւ անվտանգության քաղաքականության հարցերով մամուլի քարտուղար Մայա Կոսյանչիչի հայտարարությանը:
«Լապշինի ձերբակալության եւ Ադրբեջանին արտահանձնելու վերաբերյալ միջազգային հանրության կողմից պատշաճ արձագանքի պակասն է ոգեշնչել Բաքվին»,- գրել է Տիգրան Բալայանը եւ տեղադրել Վրաստանում Ադրբեջանի քաղաքացիների առեւանգման եւ անօրինական կալանավորման վերաբերյալ է ԵՄ Արտաքին գործերի եւ անվտանգության քաղաքականության հարցերով մամուլի քարտուղարի հայտարարությունը:
Հիշեցնենք, որ այդ հայտարարությունում նշվում է, որ Վրաստանում բնակվող Ադրբեջանի քաղաքացիների, այդ թվում՝ իրավապաշտպանների առեւանգման, անօրինական ձերբակալության եւ այնուհետեւ Ադրբեջանում նրանց կալանավորման եւ հետապնդումների մասին հաղորդումները պահանջում են արագ, համապարփակ եւ թափանցիկ հետաքննություն: «Հնարավոր չէ, որ ժողովրդավարության նկատմամբ հավակնություներ ներկայացնող երկրի տարածքում մարդ առեւանգեն, հետո տեղափոխեն մի երկիր, որտեղից նա փախել է քաղաքական սպառնալիքի պատճառով։ Հետեւաբար, կառավարությունն արդեն պետք է ապացույցներ հրապարակեր, տեսանյութեր տարածեր այդ մարդու տեղաշարժի վերաբերյալ»,-իր հերթին նշել է Վրաստանում Եվրամիության ներկայացուցչության ղեկավար Յանոշ Հերմանը:
Ավելի վաղ NEWS.am-ը հայտնել էր, որ Ռուսաստանի, Իսրայելի եւ մի շարք երկրների քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։ Լապշինը արտահանձնվել է Ադրբեջանին այս տարվա փետրվարի 7-ին:
Մայիսի 29-ին, ադրբեջանցի լրագրող Աֆղան Մուխթարլըին առեւանգել էին Թբիլիսիում եւ գաղտնի տեղափոխել Ադրբեջան: Նա Ադրբեջանից փախել էր քաղաքական հետապնդումների պատճառով: ԱՅժմ Մուխթարլըին երեք ամսով կալանավորել են Բաքվում:
