Եթե քննարկվի Հայաստանից Ռուսաստան Աբխազիայի տարածքով ապրանքների տեղափոխման հարցը, ապա տեխնիկապես դա հնարավոր է կազմակերպել։ Այս մասին հունիսի 6-ին լրագրողների հետ զրույցում ասել է «Ապավեն» էքսպեդիտորային ընկերության տնօրեն Գագիկ Աղաջանյանը։
Տեխնիկապես գործընթացը կարելի է իրականացնել հեղինակային միջնորդի հետ ։ Այդ գործում մեծ փորձ ու վստահություն են վաստակել շվեյցարական ընկերությունները։ Նրանք կարող են ընդունել բեռնատարը կամ երկաթգծային վագոնը վրացական մաքսայիններից Ինգուրի սահմանային գետի վրա, այն տեղափոխել Աբխազիայի տարածքով, իսկ Պսոու գետի վրա, որը սահմանակից է արդեն Ռուսաստանի հետ, այն հանձնել Ռուսաստանի մաքսայիններին։
Եթե բեռների հարցում օգնի այդպիսի հեղինակավոր միջնորդ, մաքսանենգության կամ անվտանգության հարցերում կասկածներ չեն ծագի, համարում է Աղաջանյանը։
Ի օգուտ աբխազական միջանցքի է խոսում շահագրգիռ կողմերի քանակը, որն ավելի է շատանում։ Ապրանքային ուղիները ձգտում է դիվերսիֆիկացնել Թուրքիան, նաեւ ինքը Ռուսաստանը, հավելեց նա։
«Հիմա այդ տարբերակն ավելի իրական է, քան երբեւէ։ Ես երբեք դա չեմ ասել ու հիմա առաջին անգամ եմ ասում»,- հավելել է Աղաջանյանը։
Նկատենք, որ Աբխազիայի տարածքով ճանապարհը շորջ տարին գործում է՝ ի տարբերություն Վերին Լարսի անցակետի՝ վրաց- ռուսական սահմանին, որը ենթակա է սողանքների, իսկ ձմռանը՝ ձյան պատճառով է անանցանելի դառնում։