Ադրբեջանական կողմը պետք է հասկանա, որ ղարաբաղյան հակամարտության հարցում իրենց տրամաբանությունը չի գործում: Այս մասին հունիսի 21-ին` «Պատերազմը զսպելու փո՞րձ: ԵԱՀԿ Մինսկի խմբի համանախագահների հայտարարությունների շեշտադրումները» թեմայով քննարկման ընթացքում հայտարարեց բանակցությունների հարցով մասնագետ, CM&Partners ընկերության ավագ խորհրդական Արթուր Մարտիրոսյանը, որը քննարկմանը միացավ տեսազանգի միջոցով:
Նրա խոսքով` հրադադարի պայմանագիրը չի նշանակում, որ պատերազմն ավարտվել է: «Իրավիճակը փոխելու համար Ադրբեջանը պետք է հասկանա, որ իր իրականացվող քաղաքականությունն իրեն սպառել է: Մենք կարող ենք նրանց լուրջ վնաս պատճառել եւ ցույց տալ, որ այլընտրանք ունենք»,- նշեց Մարտիրոսյանը` շարունակելով, որ հայկական կողմերը պետք է բանակցություններում ռազմավարությունը փոխեն: Ըստ փորձագետի` սա անհրաժեշտ է, որպեսզի հակառակ կողմը հասկանա, որ իր ներկայիս ռազմավարությունը կարող է շատ թանկ արժենալ` ընդհուպ մինչեւ տարածքների կորուստ:
