Խոստացված ներդրումների ծավալի մոտավորապես 37-40 տոկոսն արդեն իրականացվել է: Այս մասին, այսօր՝ հունիսի 23-ին, Կառավարության նիստից հետո լրագրողների հետ զրույցում նշել է Տնտեսական զարգացման եւ ներդրումների նախարար Սուրեն Կարայանը՝ հավելելով, որ իրավասու չեն անուններ հրապարակել, քան որ դա առեւտրային գաղտնիք է:
Անդրադառնալով Տաջիկստանի պատվիրակության վերջերս կայացած այցին, նա ասաց, որ իրենք համագործակցության ակնկալիք ունեն, որպեսզի ապրանքաշրջանառությունն աճի: «Կոնկրետ ոլորտների մասով արդեն ունենք պայմանավորվածություններ: Մոտ ժամանակներս՝ օգոստոսի վերջ-սեպտեմբերին, նորից տաջիկական կողմից այց կլինի, նաեւ մենք այց կկատարենք: Միեւնույն ժամանակ մենք բիզնես ֆորում իրականացրեցինք, որի արդյունքում 8-9 պայմանագրեր ստորագրվեցին կազմակերպությունների կողմից»,-ասաց նախարարը:
Նրա խոսքով, պայմանավորվածությունները վերաբերում են հիմնականում գյուղմթերքի վերամշակման ոլորտին եւ ՀՀ-ից որոշակի ապրանքի արտահանմանը. «Այդ թվում համագործակցության լուրջ հեռանկար ունեն ոսկեգործության եւ ադամանդագործության բնագավառում»: