Էքստրասենս Անի Մաջնունյանի սպանության գործով դատական նիստին այսօր` հունիսի 23-ին, Երեւանի Աջափնյակ եւ Դավիթաշեն վարչական շրջանների ընդհանուր իրավասության դատարանում ամբաստանյալ Մուշեղ Մխիթարյանը դատարանին միջնորդեց իրեն հանրային պաշտպան տրամադրել:
Դատարանը հաշվի առնելով գործի բարդությունը, որոշում կայացրեց ամբաստանյալի միջնորդությունը բավարարել եւ գրություն ուղարկել Հանրային գրասենյակին Մուշեղ Մխիթարյանին պաշտպան տրամադրելու համար:
Այսօրվա նիստին դատարանը հրապարակվեց քրեական գործով իրեղեն ապացույցները:
Հրապարակվեցին գործով առանցքային վկա, արդեն մահացած Աննա Միսակյանի հարցաքննությունից հատվածներ, ըստ որոնց` Աննա Միսակյանին ցույց է տրվել ամբաստանյալ Մուշեղ Մխիթարյանի բնակարանից հայտնաբերված դանակն ու գրտնակը, որոնք վկան ճանաչել է եւ հայտարարել, որ Մուշեղ Մխիթարյանը դեպքի օրն իր հետ է վերցրել, որոնք էլ հետագայում նրա պայուսակում են մնացել:
Սպանված էքստրասենսի համակարգչի էկրանի վրա հայտնաբերվել է նաեւ «Ես եմ» անունով պատուհան, որի մեջ եղել են ընտանեկան լուսանկարները, Մուշեղ Մխիթարյանի լուսանկարներն ու Անի Մաջնունյանին ուղարկված նամակները: Դրանք եւս քրեական գործով ապացույց են ճանաչվել:
Իրեղեն ապացույց է ճանաչվել նաեւ այն գումարը, որը հայտանբերվել է Անի Մաջնունյանի բնակարանից: Ամբաստնայլ Մուշեղ Մխիթարյանը հայտարարեց, որ Անիի հետ մտերիմ է եղել, իմացել է, թե նա որտեղ է պահում իր գումարը եւ եթե նրանից գումար հափշտակելու համար է սպանել էքստրասենսին, ապա, սպանելուց հետո այդ գումարը հափշտակած կլիներ:
Հաջորդ դատական նիստին տեղի կունենա ապացույցների հետազոտումը: Դատական նիստը հետաձգվեց:
Ավելի վաղ NEWS.am-ը տեղեկացրել էր, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել է «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով:
Սպանության մեջ մեղադրվում է 21-ամյա Մուշեղ Մխիթարյանը, որին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ): Նա կալանավորված է, չի ընդունում իր մեղքը:
Նշենք, որ գործով առանցքային վկա Աննա Միսակյանը Մուսալեռում հունվարի 8-ին ամուսնու եւ 4-ամսական երեխայի հետ բնակարանում մահացած էր հայտնաբերվել: Մուշեղ Մխիթարյանն հայտարարել էր, որ առանցքային վկայի մահը պատահականություն չէ:
