Հայաստանի եւ GSP+ ռեժիմի փոխգործակցության «մեղրամիսն» ավարտվել է, եւ մենք այժմ գտնվում ենք «երկարատեւ ամուսնության» փուլում: Այս մասին հունիսի 23-ին` լրագրողների հետ զրույցում հայտարարեց Եվրոպական արտաքին հարաբերությունների առեւտրի հարցերով խորհրդական, Հայաստանում GSP+-ի մոնիթորինգային առաքելության առաջին այցի ղեկավար Հուուս Հութուինը:
Նրա խոսքով` իհարկե, մտահոգիչ խնդիրներ կան: «Պետք է ասեմ, որ GSP+-ի մեջ մտած 9 երկրներից ոչ մեկն այս տեսակետից կատարյալ չէ, այդ թվում` եւ Հայաստանը: Տարբեր քննարկումների արդյունքում մենք Հայաստանում 3 մտահոգիչ խնդիր ենք պարզել. 1. աշխատուժի պաշտպանության արդյունավետ համակարգի բացակայության խնդիր; 2. ՄԱԿ-ի կոնվենցիաների լիարժեք կիրառումն ապահովելու համար անհրաժեշտ է օրենք ընդունել, որը նախատեսում է ընտանեկան բռնության կանխարգելում եւ դրա դեմ պայքար; եւ վերջապես 3. դատական անկախ եւ արդյունավետ համակարգ»,- նշեց Հուուս Հութուինը: Երեք խնդիրն էլ նա համարեց այնպիսի խնդիրներ, որոնց լուծումը ցանկացած երկրի համար ճանապարհ է բացում, որը ցանկանում է տնտեսական աճը համատեղել բարեխիղճ կառավարման հետ, ինչը ձեռնտու է ինչպես տնտեսվարող սուբյեկտներին, այնպես էլ երկրի քաղաքացիներին:
«Ես նոր եմ վերադարձել Հայաստանի տնտեսական զարգացման եւ ներդրումների փոխնախարար Գարեգին Մելքոնյանի նախագահությամբ հանդիպումից: Հանդիպման ընթացքում մենք մի շարք խնդիրներ ենք քննարկել, որոնց հետ կապված ես կցանկանայի Հայաստանի կառավարության կողմից լրացուցիչ գործողություններ տեսնել, ներառյալ 3 կետը, որոնց մասին նշեցի: Մենք 2018 թվականի հունվարի 1-ից ծրագրում ենք զեկույց հրապարակել, որը կներկայացվի Եվրախորհրդարանին, ԵՄ 28 անդամ երկրների Նախարարների կոմիտեին եւ քաղաքացիական հասարակությանը: Մեր այցի ավարտին մենք կառավարությանը ավելի համառոտ տեղեկանք կուղարկենք, որտեղ կնշվեն որոշակի ոլորտները, որտեղ մենք կցանկանայինք ոչ թե ծրագրեր տեսնել, այլ այս տարվա աշնան դրությամբ գործողություններ, որպեսզի այն կարողանայինք ընդգրկել հրապարակվելիք զեկույցի մեջ»,- ընդգծեց ԵՄ պաշտոնատար անձը:
Հայաստանի վերաբերյալ առաջին զեկույցը, շարունակեց նա, հրապարակվել է 2016 թվականի հունվարին: «Եվ մենք կառավարությունում մեր գործընկերներին ասել ենք, որ «մեղրամիսն» ավարտված է: Մենք հիմա գտնվում ենք «երկարատեւ ամուսնության» փուլում, սա այն ժամանակահատվածն է, որի ընթացքում կողմերը պետք է ջանքեր ներդնեն: Մենք ակնկալում ենք, որ կառավարությունը լրացուցիչ առաջընթաց կապահովի ՄԱԿ-ի 27 կոնվենցիաների կատարման ուղղությամբ, իսկ մեր կողմից` 8,7 մլն եվրոյի արտոնությունները: Մենք մեր կողմից ջանքեր կներդնենք, հույս ունեմ, որ Հայաստանի կառավարությունը նույնպես անհրաժեշտ ջանքեր կներդնի»,- հավելեց Հուուս Հութուինը: