Զուտ կառուցվածքային փոփոխության արդյունքում ՊԵԿ-ում շուրջ 483 հաստիք կրճատվել է։ Այս մասին, այսօր՝ հունիսի 27-ին, ԱԺ-ում լրագրողների հետ զրույցում նշել է Պետական եկամուտների կոմիտեի նախագահ Վարդան Հարությունյանը։

Դիտարկմանը, թե արդյոք սա նշանակո՞ւմ է, որ ՊԵԿ-ի աշխատակազմը ուռճացված է եղել Վարդան Հարությունյանը ասաց, որ տարիների ընթացքում ՊԵԿ-ի IT համակարգը վերազինվել է, նոր տեխնոլոգիաների դարաշրջանում բնական է, որ մարդկային գործոնի առկայությունն ավելի քչանում է, որի արդյունքում ունենք կրճատումներ:

Հարցին, թե կրճատվել են կաշառակերնե՞րը, թե նաեւ թեւ ու թիկունք ունեցողները, Վարդան Հարությունյանը պատասխանեց. «Իհարկե, կրճատումների հիմքում կարող են նաեւ սուբյեկտիվ դրսեւորումներ լինել։ Մեկ ամսվա մեջ այս ամբողջ աշխատանքներն իրականացնելն ու ավարտին հասցնելը, իհարկե, դժվար է եղել:  Կարող են նաեւ թերություններ ու վրիպումներ լինեն, բայց էն աշխատակիցները, որոնք բարեխիղճ աշխատել են եւ այս ընթացքում միգուցե եւ դուրս են մնացել համակարգից, ամեն օր, ամեն ամիս փոփոխություններ լինում են, եւ նրանք մեր տեսադաշտից դուրս չեն մնա»:

ՊԵԿ նախագահը նորմալ համարեց, որ ՊԵԿ-ի համակարգից ձերբակալություններ են լինում. «Եթե ինչ-որ մեկը իր աշխատանքի ընթացքում խախտում է իր լիազորությունը եւ իր լիազորությունից դուրս այլ գործառույթ է իրականացնում, բնական է, որ պետք է գործող օրենքների շրջանակում պատասխան տա»:

Լրագրողները Վարդան Հարությունյանին հիշեցրին, որ տեսակետներ կան, թե մանր ձկներն են պատասխանատվության ենթարկվում, իսկ խոշոր կոռուպցիոներները չեն պատժվում։

«Ես չգիտեմ՝ մանր ձուկ, խոշոր ձուկ ասելով՝ ինչ նկատի ունեք։ Համենայնդեպս, կալանավորվում են... եթե ունեք ինֆորմացիա, խնդրում եմ ներկայացրեք, եւ վստահեցնում եմ, որ ձեր նշած մարդիկ նույնպես կկալանավորվեն»,-ասաց նա։