Չորրորդ ամիսը հաջորդաբար օտարերկրյա ներդրողները կրճատում են ակտիվները Ռուսաստանում։ Այդ ժամանակահատվածում նրանք ռուսական բաժնետոմսերից դուրս են հանել 1․6 մլրդ դոլար՝ առավելագույն արտահոսքը վերջին երեք ու կես տարիներին։ Ներդրողների փախուստը կապակցված է ԱՄՆ-ի ու Ռուսաստանի մերձեցման հետ կապված չիրականացված ակնկալիքներով, «Ռոսնեֆտի» ու «Սիստեմա»-ի միջեւ կորպերատիվ վիճաբանության սրումով, նաեւ նավթի գների անկումով, գրում է «Կոմերսանտը»։

Emerging Portfolio Fund Research (EPFR)-ի տվյալները վկայում են այն մասին, որ օտարերկրյա ներդրողները շարունակում են կրճատել ռուսական ֆոնդային շուկային ուղղված հիմնադրամներում իրենց ներդրումները։ «Կոմերսանտի» գնահատականներով, մեկ շաբաթում նման հիմնադրամներից հանված միջոցների ծավալը գերազանցել է 83 մլն դոլարը։ Ռուսական շուկայից օտարերկրյա ներդրումների անդադար արտահոսքը շարունակվում է փետրվարի վերջից։ Ընդամենը չորս ամսում այն գերազանցել է 1․6 մլրդ դոլարը։

Մինչդեռ դեպի մյուս զարգացող երկրների ակտիվներ նկատվում է ներդրումների ներհոսք։ Միջոցների ներգրավման հարցով ԲՐԻԿ երկրներից առաջատար են դարձել Հնդկաստանն ու Բրազիլիան, որոնց ֆոնդերում չորս ամսում ներդրվել է համապատասխանաբար 2․6 ու 1 մլրդ դոլար։