Անցած տարվա ապրիլյան էսկալացիան ցույց է տվել, որ այսօր խրամատներում հայ զինծառայողը պատրաստ է ամեն ինչի։ Այս մասին վստահեցնում է Հայկական պետական մանկավարժական համալսարանի իրավաբանական ֆակուլտետի համեստ շրջանավարտ, ապրիլյան էսկալացիայի մասնակից Սարգիս Խաչատրյանը, որը բուհի 20 այլ շրջանավարտների հետ միասին հուլիսի 3-ին ստացել է դիպլոմ  ԼՂՀ նախագահ Բակո Սահակյանի ձեռքից։

24-ամյա պայմանագրային զինծառայողը Շիրակի մարզի Արթիկ քաղաքից է։ «Արդեն 5 տարի է ծառայում եմ Քարվաճառում, մասնակցել եմ քառօրյա պատերազմին։ Այդ օրերին Թալիշ գյուղում եմ գտնվել։ Մեր մարտական խնդիրն է հակառակորդին հետ շպրտել ելման դիրքեր»,- շեշտել է Սարգիսը։

Այն հարցին, թե ինչու է նա որոշել պայմանագրային զինծառայող դառնալ, Սարգիսը պատասխանեց, որ դա իրեն է փոխանցվել ժառանգաբար՝ եւ պապը, եւ հայրը զինվորականներ են ։ «Իսկ ես շարունակում եմ նրանց գործը»,- հպարտորեն ասում է Սարգիսը։ Ապրիլյան իրադարձությունների հերոսները՝ կամավորական Հրաչ Մուրադյանը, պայմանագրային զինծառայողներ՝ Վրեժ Սարգսյանը, Հարություն Աբրահամյանը, Արգիշտի Գաբոյանը եղել են Սարգիսի մարտական ընկերները։