TSD հայկական պլանշետներ արտադրողը՝ իտալական IDS-ի հետ համատեղ Երեւանում հատուկ նշանակության հետազոտությունների կենտրոն (forensic) կբացի։ Այս մասին հուլիսի 14-ին լրագրողների հետ զրույցում ասաց ընկերության հիմնադիր եւ տնօրեն Վահան Շաքարյանը։
Նրա խոսքով՝ 5 տարում ընկերությունները պատրաստվում են շուրջ 10 մլն եվրո ներդրում կատարել։ Տեխնոլոգիաներն ուղղված են պաշտպանության եւ քրեագիտության ոլորտների զարգացմանը։ Մասնավորապես՝ դրանք օգնում են արագացնել ԴՆԹ թեստը, մատնահետքերի ուսումնասիրությունը եւ այլն։ Դրանք կարող են նաեւ քաղաքացիական կիրառություն ունենալ, օրինակ՝ կանխատեսել երկրաշարժերը։
Համագործակցություն ծավալելուն օգնել է հունիսին Հռոմում հայ-իտալական միջկառավարական հանձնաժողովի առաջին նիստը։ Իսկ ավելի վաղ Հայաստանի զարգացման հիմնադրամը Իտալիայում առեւտրա-ներդրումային ներկայացուցիչ է նշանակել՝ արտահանությանն օժանդակելու եւ ներդրումներ ներգրավելու համար։