Պաշտպանության նախկին փոխնախարար «Զինված խմբի» գործով կալանավորված Վահան Շիրխանյանի շահերի պաշտպան Հայկ Ալումյանը պնդում է, որ դատավոր Բեկթաշյանն ամեն կերպ փորձում է ձգձգել դատական նիստերը: Այս մասին այսօր՝ հուլիսի 14-ին, լրագրողների հետ զրույցում ասաց նա: Նա նշեց, որ դատավորն այսօր իր պաշտպանյալին դատարան չբերելով խախտել է Դատավարության մասին օրենքը: Նրա խոսքով, դատավոր Բեկթաշյանը չի կարող առանց իր պաշտպանյալի դատական նիստ անցկացնել:
«Քրեական դատավարության մասին օրենքի 173 հոդվածում չի ասվում, որ դահլիճից հեռացնելու սանկցիան հաշվարկվում է միայն նիստերի ժամերով: Դատավորը նախ խախտել է իր իսկ որոշումը, հետո էլ ամեն անգամ մի պատրվակով նիստերի ձգձգումը փորձում է բարդել պաշտպանական կողմի վրա»,- ասաց Ալումյան:
Ամբաստանյալներից Էդվարդ Ներսիսյանի շահերի պաշտպան Կարմեն Պողոսյանն էլ առաջարկում է այս գործից առանձնացնել Վահան Շիրխանյանի գործը, որպեսզի ամեն անգամ դատական նիստերը չհետաձգվեն. «Ես հարգում եմ եւ Վահան Շիրխանյանին, եւ Հայկ Ալումյանին, սակայն, կարծում եմ, որ այս գործը պետք է առանձնացվի, որպեսզի ամեն անգամ Վահան Շիրխանյանի պատճառով նիստերը չհետաձգվեն»: