Լույս երեքշաբթի գիշեր Խորվաթիայի մեծությամբ երկրորդ՝ Սփլիթ քաղաքի արվարձաններում մոլեգնում են բնական հրդեհները։ Այս մասին հաղորդում է «ՌԻԱ Նովոստի»-ն՝ վկայակոչելով Slobodna Dalmacija եւ Index տեղեկատվական պորտալները։

Կրակի դեմ պայքարում են հարյուրավոր փրկարարներ, զինծառայողներ եւ կամավորներ։ Հատկապես բարդ է իրավիճակը քաղաքի հարավ-արեւելքում՝ Պոդստրանա շրջանում, որտեղ մարդիկ պայքարում էին բնակելի կառույցները կրակից պաշտպանելու համար։

Երկուշաբթի երեկոյան եւ երեքշաբթի գիշերը տարհանվել են Ժրնովինցա, Ստրոժանաց արվարձանների բնակիչներն ու մի քանի խոշոր առեւտրի կենտրոններ։

Տվյալ պահին կրակը ոչնչացրել է մի քանի բնակելի կառույցներ, տնտեսական օբյեկտներ եւ քաղաքի ծայրամասում գտնվող մանկապարտեզը։

Slobodna Dalmacija-ն փոխանցում է, որ երկուշաբթի հրդեհը հանգցնող 5 հրշեջներ քաղաքային հիվանդանոց են տեղափոխվել՝ ծխից թունավորվելու պատճառով։ Նրանց կյանքին վտանգ չի սպառնում։ Եվս մի քանի փրկարարների տեղում են օգնություն ցույց տվել։