Արմատական տրամադրություններով անարխիստներն ավելի քան 60 խանութ են ավերել Հունաստանի մայրաքաղաքի գլխավոր առեւտրային փողոցում: Այս մասին հայտարարել է Աթենքի քաղաքապետ Յորգոս Կամինիսը, հայտնում է Associated Press-ը:
Երկուշաբթի երեկոյան մոտ 150 երիտասարդներ՝ մուրճերով եւ մետաղյա ձողերով զինված, ներխուժել են հայտնի Էրմու փողոց եւ սկսել կոտրել խանութների ցուցափեղկերը: Նրանք այս կերպ բողոքել են դատարանի որոշման դեմ, որով մերժվել էր 29-ամյա կնոջ բողոքը, ում դատապարտել էին անարխիստական կազմակերպություններից մեկին անդամակցելու համար, որը Հունաստանում ահաբեկչական է ճանաչվել:
Իրավիճակը հսկողության տակ պահելու համար ոստիկանությունը արցունքաբեր գազ է կիրառել: Ձերբակալվել է անկարգությունների 13 մասնակից: Նրանց մեծ մասին ազատ են արձակել հարցաքննելուց հետո, բացի մեկից:
Արմատականներն արդեն հայտարարել են առաջիկայում իրենց ակցիաները շարունակելու մասին:
