Իսրայելի փորձը գյուղատնտեսության ոլորտում, մասնավորապես ջրային ռեսուսների օգտագործման առումով, կարող է ուսանելի լինել Հայաստանի համար: Այս մասին, այսօր՝ հուլիսի 29-ին, Իսրայելի Պետության տարածաշրջանային համագործակցության նախարար Ցախի Հանեգբիի հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ ողջունելով հյուրերին` ՀՀ գյուղատնտեսության նախարարը կարեւորել է երկու երկրների միջեւ գյուղատնտեսության ոլորտում տարբեր ուղղություններով համագործակցությունն ակտիվացնելու ջանքերի անհրաժեշտությունը` ընդգծելով, որ Իսրայելի փորձը գյուղատնտեսության ոլորտում, մասնավորապես ջրային ռեսուրսների օգտագործման առումով, կարող է ուսանելի լինել Հայաստանի համար:
«Մենք մշտապես բաց ենք համագործակցության համար եւ պատրաստ ենք քննարկել բոլոր առաջարկները, որոնք կակտիվացնեն երկու երկրների միջեւ գյուղատնտեսության ոլորտում համագործակցությունը, ինչպես նաեւ օժանդակել գործարար շրջանակների միջեւ կապերի ամրապնդմանն ու աշխուժացմանը: Գյուղատնտեսության նախարարությունը մի շարք ուղղություններով, մասնավորապես կաթիլային ոռոգման, հակակարկտային ցանցերի տեղադրման, գյուղտեխնիկայի, ինտենսիվ այգիների հիմնման սուբսիդավորման պետական աջակցության ծրագրեր է նախաձեռնել, որոնք բաց են եւ հետաքրքրության դեպքում մասնակցության հայտ կարող են ներկայացնել նաեւ իսրայելական ընկերությունները»,- իր խոսքում մասնավորապես նշել է Իգնատի Առաքելյանը:
Ցախի Հանեգբին իր հերթին կարեւորել է երկու երկրների միջեւ համագործակցության խթանումը` շեշտադրելով մասնավոր հատվածի ներգրավումն ու այդ ուղղությամբ գործնական քայլեր իրականացնելու անհրաժեշտությունը: Նրա խոսքով` գյուղատնտեսությունը Հայաստանի եւ Իսրայելի միջեւ փոխգործակցության թերեւս «ամենաբնական» ոլորտն է:
Երկու երկրների պաշտոնյաները մտքեր են փոխանակել նաեւ ոռոգման, կաթի արտադրության եւ վերամշակման, ջերմոցաշինության ոլորտում համագործակցության հնարավորությունների վերաբերյալ:
Հյուրերը տեղեկացրել են, որ Իսրայելի կառավարությունը նախատեսում է Հայաստանի հետ նոր ծրագրեր իրականացնել: Մասնավորապես իսրայելցի գործարարները հետաքրքրված են Հայաստանում հիմնել կաթի վերամշակման գործարան, ինչպես նաեւ երկարաժամկետ վերապատրաստումներ իրականացնել Հայաստանի ազգային ագրարային համալսարանի ուսանողների համար` իսրայելական գյուղատնտեսության փորձին ծանոթանալու եւ նորարարական տեխնոլոգիաները Հայաստանում ներդնելու նպատակով:
Ցախի Հանեգբիին հրավիրել է ՀՀ գյուղատնտեսության նախարարին այցելել Իսրայել` մասնակցելու «Ուոթերթեք» եւ «Ագրիթեք» միջազգային գյուղատնտեսական ցուցահանդեսներին:
ՀՀ գյուղատնտեսության նախարարն իր հերթին խնդրել է իր պաշտոնակցին փոխանցել հոկտեմբերին Երեւանում կայանալիք «Արմպրոդէքսպո» ամենամյա մասնագիտացված ցուցահանդեսին մասնակցելու հրավերը:
