Հայաստանը առաջին տեղն է զբաղեցրել ԱՊՀ այն երկրների շարքում, որտեղ թրաֆիքինգի մակարդակը նվազագույնի է հասցվել արդյունավետ պայքարի արդյունքում։ Այս մասին լրագրողների հետ հուլիսի 28-ի հանդիպման ժամանակ հայտնել է Հայաստանի ԱԳՆ առընթեր միջազգային կազմակերպությունների հարցերով բաժանմունքի ղեկավար, Թրաֆիքինգի դեմ պայքարի հարցերով աշխատախմբի ղեկավար Վահրամ Կաժոյանը։

Կաժոյանը նշեց, որ մարդկանց թրաֆիքինգի մասին ԱՄՆ Պետդեպարտեմնտի 2017-ի տարեկան հաշվետվության տվյալներով Հայաստանը արդեն 5 տարի հայտնվում է այն երկրների առաջին խմբում, որտեղ թրաֆիքինգը, արդյունավետ պայքարի շնորհիվ նվազագույնի է հասցվել։ Միաժամանակ, նրա խոսքով, այդ ցանկում 187 երկիր է նշված, որոնցից միայն 36 երկրներ են առաջին դրական խմբում ։ Հայաստանը նաեւ ԱՊՀ միակ երկիրն է, որն առաջին խմբում է ընդգրկվել։

«Մեր անկախության առաջին տարիների համեմատ՝ թրաֆիքինգի զոհերի թիվը զգալիորեն կրճատվել է։ Եթե 1992-1993 թթ․ մեկ գործով 200 զոհ էր անցնում, ապա վերջին տարիներին քրեական գործերում մեկ կամ երկու մարդ է անցնում»,- պարզաբանել է Կաժոյանը։

Կաժոյանը հիշեցրել է, որ Հայաստանը պայքարում է մարդկանց առեւտրի դեմ արդեն մոտ 10 տարի։

Նա նաեւ նշել է, որ Հայաստանը թրաֆիքինգի աղբյուր-երկիր  է, որի հիմնական հոսքերը ուղղված են Թուրքիա, Ռուսաստան ու ԱՄԷ։