News
Լրահոս
News
Երկուշաբթի
Հոկտեմբեր 22
Տեսնել լրահոսը

Դեռ ոչ մի տարի Եվրոպայի լիգայում այսքան անհաջող չէին խաղացել հայկական թիմերը: Անհաջողության հիմնական պատճառը՝ վեցթիմանոց առաջնությունն է: Կարծում եմ՝ խնդրի միակ լուծումը պրոֆեսիոնալ լիգա ստեղծելն է: Այս մասին NEWS.am թղթակից Վերա Մարտիրոսյանի հետ զրույցում ասաց «Շիրակ» ֆուտբոլային ակումբի նախագահ, գործարար Արման Սահակյանը:

Պարոն Սահակյան, մի քանի օրից կմեկնարկի Հայաստանի Բարձրագույն խմբի առաջնությունը: Կրկին 6 թիմով ենք սկսելու: Եվրագավաթներն էլ այս տարի կրկին, կարելի է ասել, ձախողեցինք: Ի՞նչ կարելի է սպասել այս տարի:

Ցավոք, «Շիրակը» նույնպես այս տարի վատ հանդես եկավ՝ հատկապես առաջին խաղում: Այս տարի Հայաստանի բարձրագույն խմբում հանդես կգան միայն 6 թիմեր: Ես արդեն 7 տարի է ֆուտբոլի մեջ եմ և կարող եմ ասել, որ մեր ֆուտբոլը հետընթաց է ապրում: Դեռ ոչ մի տարի Եվրոպայի լիգայում այսքան անհաջող չէին խաղացել հայկական թիմերը: Անհաջողության հիմնական պատճառը՝ վեցթիմանոց առաջնությունն է: Այս տարի առաջին անգամ էինք խաղում 6 թիմերով: Տարին մի քանի անգամ նույն թիմերի հետ ենք խաղում, անգամ ընկերական հանդիպումները: Ֆուտբոլիստների մոտ մոտիվացիայի պակաս է սկսվում: Ինչքան կարող է այսպես շարունակվել՝ չգիտեմ, բայց իրավիճակը մտահոգիչ է: Այս ձևաչափը ցույց տվեց, որ զարգանալու տեղ չկա: Կարծում եմ՝ խնդրի միակ լուծումը պրոֆեսիոնալ լիգա ստեղծելն է, երբ ակումբի նախագահները իրենք կորոշեն իրենց անելիքները, առաջնության հետ կապված հարցերը: Ես ինքս եղել եմ գործկոմի անդամ, երբ քվեարկել եմ մրցաշարի աշուն – գարուն ձևաչափին անցնելու տարբերակի օգտին, բայց այս պահին տեսնում եմ, որ դա շատ սխալ է: Այս կարգի հարցերը պետք է քննարկեն ակումբների նախագահները: Բացի այդ, ստացվում է, որ Հայաստանի առաջնությունում հիմնական կազմում խաղալու 66 տեղ կա ու գումարած դրան լեգեոներների թվի սահմանափակում չկա: Եթե մոտավոր 26 լեգեոներ էլ խաղա, ստացվում է, որ Հայաստանի առաջնությունում կարող են խաղալ 40 հայ ֆուտբոլիստներ: Մեզ մոտ՝ Գյումրիում, պարապում են 450 երեխաներ: Հարցերն ու խնդիրները շատ են: Միակ լուծումը պրոֆեսիոնալ լիգա ստեղծելն է: Գուցե այդ դեպքում էլ մեծ փոփոխություններ չլինեն, բայց այն մարդիկ, ովքեր գումար են ծախսում ֆուտբոլի վրա, կկարողանան իրենք իրենցով լուծումներ ման գալ:

Ինչպե՞ս եք պատկերացնում պրոֆեսիոնալ լիգայի գործունեությունը:

Ինչպես և մյուս բոլոր տեղերում: Եվրոպայի գրեթե բոլոր երկրներում կան պրոֆեսիոնալ լիգաներ: Իրենք իրենց մեջ են լուծում խնդիրները՝ անգամ Ուկրաինայում, Ռուսաստանում, Վրաստանում: Մենք ունեինք Վահան Բիչախչյանի պես լավ կադր: Հնարավոր է՝ եկող սերնդում էլ լինեն տաղանդավոր երեխաներ: Բայց գլոբալ առումով դա թիմի համար փրկություն չէ: Եթե այսպես շարունակվի, միակ հույսը՝ հաջորդ Եվրոպայի լիգայում ավելի թույլ մրցակցի հանդիպելն է: Այս ինքնահոս վիճակում ոչ մի դրական բան չկա:

Իսկ եթե լիգան ստեղծվի, ներդրումները կմեծանա՞ն: Չէ որ անընդհատ ասվում է, որ Հայաստանում, հաշվի առնելով տնտեսական վիճակը, ֆուտբոլի մեջ ներդրումներ չեն արվում:

Թիմ պահելը պետք է ավելի էժան լինի: Ինչպե՞ս լինի էժան, եթե բոլոր թիմերը ձգտում են դառնալ չեմպիոն ու բերեն լեգեոներներ: Կարող է մի թիմ ունենա  80 000 դոլար բյուջե և 7-րդ տեղ գրավի: Դա նրանց համար մեծ դժբախտություն չի լինի: Մեր խնդիրը նրանում է, որ բոլոր թիմերը ցանկանում են խաղալ Եվրագավաթերում, որ գումար վաստակեն: Այն թիմերը որոնք չեն խաղում, փակվում են: «Միկայի» վերջին մրցաշրջանը վառ օրինակ է: Եթե ունենաք 6 թիմ միշտ վերջին 2 չեն խաղա ու գումար չեն վաստակի, բայց այդպես չպետք է լինի: Իտալիայում այն թիմերը, որոնք մրցանակային տեղերում չեն հայտնվում, չեն փակվում: Հայաստանում կան ավելի շատ ֆուտբոլիստներ, քան թիմերում՝ տեղեր: Շատ երիտասարդներ պատրաստ են խաղալ շատ ավելի քիչ գումարով, միայն թե մնան ֆուտբոլի մեջ, որ զարգանան:

Բայց կա նաև բանակի խնդիրը:

Բանակի խնդիրը ֆունդամենտալ է, բայց պետք է հասկանանք՝ ինչ երկրում ենք ապրում: Լավ կլիներ, իհարկե, բանակը իր թիմն ունենար: Մեծ ծախսեր չէր պահանջվի, բայց շատ ֆուտբոլիստների օգուտ կլիներ:

Ձեզ մոտ երբևիցե եղե՞լ է միտք թողնել «Շիրակը»:

Իմ դեպքում մի քիչ այլ է: Մենք ունենք մեծ ակադեմիա: Շուտով լավ արդյունքներ ենք տեսնելու: Այս պահին մեզ մոտ 2000-ին ծնված երեխաների մեջ շատ լավերը կան: Մի քանի տարուց մենք կխաղանք միայն տեղացիներով: Թիմը թողնելու գայթակղությունը, իհարկե, եղել է, բայց մեր ակադեմիայում պարապում են 450 երեխաներ: Ի տարբերություն Երևանի, որտեղ հնարավորություններն ու թիմերը ավելի շատ են, այնտեղի երեխաների  համար թիմում խաղալը արդեն մեծ երազանք է: Գյումրին համարվում է սպորտի մայրաքաղաք, բայց այս պահին Գյումրիում ֆուտբոլով ավելի շատ երեխա է զբաղվում, քան մյուս բոլոր մարզաձևերում՝ իրար հետ վերցրած: Իսկ մյուս մարզաձևերը հովանավորվում են պետության, մարզպետարանի կողմից: Հաջողված ֆուտբոլիստն ավելի շատ է վաստակում, քան մյուս մարզաձերի ներկայացուցիչները: Դա էլ է երեխաներին մոտիվացնում:  Վահան Բիչախչյանի օրինակը, հուսամ, կօգնի երեխաներին:

Այս տարի երկու նոր թիմեր բացվեցին, որոնք հանդես կգան Առաջին խմբում: Դա ինչ-որ տեղ հուսադրո՞ւմ է:

Իհարկե, բայց ավելի լավ կլիներ, որ նրանք հանդես գային Բարձրագույն խմբում:

Եթե նորաստեղծ թիմերը խաղային Բարձագույն խմբում կամ առաջնությանը մասնակցեր  10  թիմ, դա ինչ-որ տեղ փրկություն կլինե՞ր:

Կլիներ: Մենք ամբողջ տարին սպասում էինք, որ թիմերի քանակը կավելանա, բայց մնացինք կրկին վեցով, և դա չի կարող ազդեցություն չունենալ: Մի թիմի ֆուտբոլիստները, որ անընդհատ խաղան նույն մրցակցի հետ, կբթանան: Բացի այդ մենք այլ խնդիր էլ ունենք. մենք չենք խաղում հարևանների հետ: Պարսկական թիմերի հետ չենք կարողանում խաղալ: Նրանց գրաֆիկը այլ է՝ մեր գրաֆիկի հետ չի բռնում: Վրացիների հետ էինք փորձում խաղալ, նրանց մոտ առաջնություն էր: Եթե երկու բառով ամփոփենք այս հարցազրույցը՝ Հայաստանի առաջնությունը այս տեմպերով շատ կթուլանա, իսկ արդյունքը կտեսնենք Եվրոպայի լիգայի խաղերի ժամանակ: Այն մարդիկ, ովքեր ծախսեր են անում ու մտահոգ են, նրանք էլ պետք է  ղեկավարեն ֆուտբոլային լիգան, ինչպես ամբողջ աշխարհում է: Դա վերաբերում է մրցաշարի ձևաչափին, խաղերի հեռարձակմանը, անգամ հովանավորչական հարցերին:

Իսկ այս թեման երբեք չի՞ բարձրացվել:

Համենայն դեպս ես ինքս նման քննարկման չեմ մասնակցել:

Վերա Մարտիրոսյան

!
Այս նյութը հասանելի է նաև   Русский
Տպել
Կարդացեք նաև
Ամբողջը
Լեգենդար Բատիստուտան՝ հայկական Վարդավառի եւ կովեր պահելու մասին (Ֆոտո)
Բատիստուտան պատմել է, որ այլեւս ֆուտբոլով չի զբաղվում․․․
Լեգենդների հանդիպմանը կնախորդեն մի շարք միջոցառումներ, այդ թվում համերգներ, վարպետության դասեր
Հիշեցնենք, որ բացի Լեգենդների խաղից, հուլիսի 6-8-ին առաջին անգամ Երեւանի պատմության մեջ կստեղծվի ֆան-գոտի, որը «Ազատության հրապարակում կընդունի բոլոր երկրպագուներին...
Նիկիտա Սիմոնյանը Մարադոնայի մեծահոգության, Ռուսաստանի հավաքականի «սխրանքի» եւ չեմպիոնի կոչման նոր հավակնորդների մասին
Չեմ ուզում անհամեստ լինել, բայց ինձ համար «ամենա»-ն այն առաջնությունն էր, որտեղ ես էի խաղում...
Երեւան կժամանի աշխարհահռչակ ֆուտբոլիստ Ռոբերտո Կարլոսը
Լատինական Ամերիկայի եւ Եվրոպայի վետերան ֆուտբոլիստներից կազմված հավաքականների Երեւանում կայանալիք հանդիպմանը կմասնակցեն այնպիսի լեգենդներ, ինչպիսիք են...
Բացառիկ հնարավորություն լեգենդի հետ լուսանկարվելու համար, ինչպես նաեւ շահելու Լեգենդների խաղի տոմս
Խաղարկությունը կացկացվի ամեն օր fcyerevan.com կայքում...
Լեգենդար Չավին՝ հայկական գինու, Մեսսիի ու իր երազանքների մասին (ֆոտո)
Մեկ խաղացողի անուն տալը բարդ է, քանի որ «Բարսելոնան» ավելի ուժեղ դարձնելու համար պետք է ֆենոմենալ հատկանիշներ ունենալ․․․
Ամենաշատ
Partner news