Նույնիսկ Չինաստանն այս տարածաշրջանում շահեր ունի։ Այս մասին օգոտստոսի 4-ին լրագրողների հետ հանդիպման ժամանակ հայտարարեց քաղաքագիտության դոկտոր Հայկ Մարտիրոսյանը՝ պատասխանելով NEWS.am-ի թղթակցի հարցին, արդյո՞ք կարելի է արցախյան հակամարտությունը միայն հայկական եւ ադրբեջանական կողմերի խնդիր համարել, եթե նույնիսկ Չինաստանը տարածաշրջանում իր շահերն ունի եւ արդյո՞ք միջազգային հանրությունը թույլ կտա տարածաշրջանում նոր լայնածավալ պատերազմ սկսել։
Փորձագետը նշեց, որ Չինաստանը երկրի ներսում ույղուրների հետ կապված խնդիրներ ունի (Չինաստանի հյուսիս-արեւմուտքում բնակվող թյուրքալեզու ժողովուրդ), որոնք անմիջական կապ ունեն Թուրքիայի հետ։ «Այդ խնդրրը հաճախ անմիջական կապ ունի Թուրքիայի հետ, քանի որ ույղուրները ստանում են հենց Անկարայի աջակցությունը։ Տարածաշրջանում Անկարայի դիրքերի ամրապնդումը, այդ թվում նաեւ տարածքային տեսանկյունից, Չինաստանին եւս ձեռնտու չէ։ Եվ դա Պեկինում շատ լավ են հասկանում»,-հստակեցրեց քաղաքագետը։
Մարտիրոսյանը նշեց նաեւ, որ ինքը վստահ չէ, որ միջազգային հանրությունը կամ որեւէ մի պետություն իսկապես կցանկանա կանգնեցնել Ադրբեջանին, թե նա որոշի Արցախում վերսկսել ռազմական գործողությունները։ «Հայաստանում պետք է վերջնականապես հրաժարվեն հավատալ միջազգային հանրությանը կամ համենայն դեպս դադարեն նրա հետ դրական կամ բացասական հույսեր կապել»,-վստահ է փորձագետը։