Ադրբեջանական լրատվամիջոցները սկսել են ակնհայտ կեղծիքներ հրապարակել։ Այս մասին հայտարարեց Արցախի Հանրապետության նախագահի մամուլի քարտուղար Դավիթ Բաբայանը՝ NEWS.am-ի թղթակցի խնդրանքով մեկնաբանելով ադրբեջանական լրատվամիջոցներում հրապարակված «սենսացիոն» նյութը։
«Հրապարակված «նամակն» ակնհայտ կեղծիք է։ Դրանում ճշմարիտ է միայն պաշտպանության նախարարության զինանշանը, եւ այն դյուրությամբ կարելի է գտնել գերատեսչության կայքում»,-ընդգծեց Բաբայանը։
Նա նաեւ ուշադրություն դարձրեց տեքստում առկա մեծ թվով ուղղագրական ու ոճաբանական սխալներին։ «Դա խոսում է այն մասին, որ տվյալ տեքստի հեղինակը հայերենի կրող չէ։ Չնայած ակնհայտ է, որ այն ուսումնասիրելու համար մեծ ջանքեր են գործադրվել»,-նկատեց Բաբայանը։ Ինչ վերաբերում է նամակի բովանդակությանը՝ Բաբայանը նշեց, որ տեքստի հեղինակները, իրենց ցանկությունից անկախ, արցախցի սպաներին գերմարդկային ունակություններ են վերագրել։
«Ընդհանուր առմամբ, կարելի է արձանագրել, որ հայերենի ուսումնասիրության քրտնաջան աշխատանքներ են տարվում։ Սակայն հաշվի առնելով դրա վրա ծախսված միջոցները՝ զարմացնում է արդյունքի ցածր որակը՝ պատրաստված կեղծիքի տեսքով։ Բայց այդպիսին է ազգայնականության բնույթը՝ ատելությունը զարգացմանը խոչընդոտող գործոն է, եւ ադրբեջանցի կեղծարարները, բարեբախտաբար, երբեք չեն հասնի ցանկալի արդյունքի»,-եզրափակեց Արցախի Հանրապետության նախագահի մամուլի քարտուղարը։
