Porsche-ն իր հաճախորդներին կփոխհատուցի արեւապաշտպան ակնոցի գումարը, որպեսզի լուծի ինտերիերների փայլող տարրերի խնդիրը։ Motor-ի փոխանցմամբ՝ գումարը կարող են ստանալ բաց գույնի սալոններով մոդելների սեփականատերերը, քանի որ նրանց համար անհարմար է արեւոտ եղանակին մեքենա վարելը։

Porsche-ը նման որոշում է կայացրել ԱՄՆ-ում հաճախորդներից ստացած հավաքական դիմումից հետո։ Նրանք դժգոհում էին առջեւի փայլուն վահանակից ու հայտնել էին, որ ընկերությունը պետք է լուծի այդ խնդիրը, քանի որ այն անհարմարություններ է պատճառում ու վթարային իրավիճակներ ստեղծում։

Փայլուն տարրերը փոխարինելու փոխարեն՝ գերմանական ընկերությունը որոշել է 50-ից 175 դոլարի սահմանում փոխհատուցում առաջարկել ակնոցի գնման համար։ Այդ փոխհատուցումը կարող են ստանալ 2007-2016 թթ․ մոդելների սեփականատերերը, եթե դրանց ինտերիերը Luxor Beige, Cognac, Natural Brown, Platinum Gray եւ  Sand Beige գունային սխեմաների մեջ է։

Փոխհատուցում ստանալու հայտերն ընդունվում են մինչեւ սեպտեմբերի 21-ը։