Հայաստանի տարածքում բռնկված անտառային հրդեհների շուտափույթ չեզոքացման հարցում դժվարություններ ստեղծեց արագ արձագանքման խմբերի բացակայությունը։ Այս մասին օգոստոսի 17-ին լրագրողների հետ հանդիպման ժամանակ հայտարարեց «Հայ անտառ» պետական ոչ կոմերցիոն կազմակերպության տնօրենի տեղակալ Ռուբեն Պետորսյանը։

Պետրոսյանը նշեց, որ Հայաստանի բոլոր անտառտնտեսություններում՝ լինեն դրանք արգելոցներ, թե ազգային պարկեր, պետք է լինեն արագ արձագանքման խմբեր, որոնք անհրաժշետության դեպքում թույլ չեն տա հրդեհի տարածումը։ «Որոշ անտառներում, ճիշտ է, կան այդպիսի խմբեր։ Օրինակ՝ Կապանում եւ Հրազդանում։ Նրանք նաեւ ունեն տրանսպորտային միջոցներ, որոնք ապահովված են ջրելու համար անհրաժեշտ սարքերով եւ այլ անհրաժեշտ միջոցներով»,-հավելեց  Պետրոսյանը։

Հիշեցնենք, որ վերջին տվյալներով, հանրապետության տարածքում սկսված հրդեհներն արդեն չեզոքացվել են։ Վայոց ձորի մարզում հրդեհի հետեւանքով շուրջ 15 ք/կմ տարածք է այրվել, որից՝ 320 հեկտարը՝ անտառային տարածքներ։ Իսկ «Խոսրովի անտառ»-ում վերջին տվյալներով այրվել է 16 ք/կմ տարածք, որից 360 հեկտարը՝ անտառային հատվածներ։