Երեւանի Մալաթիա -Սեբաստիա համայնքում՝ Բաբաջանյան 52 հասցեում, օգոստոսի 18-ին բացվեց մայրաղաքում արդեն 20-րդ «Նոր Զովք» սուպերմարկետը: Իսկ մինչև տարեվերջ նախատեսվում է, որ կբացվեն ևս 3-ը: «Մենք շուրջ 18 տարի արդեն աշխատում ենք, ու սպառողների մոտ հայտնի ենք, որպես թարմ և մատչելի ապրանքներ ներկայացնող սուպերմարկետ։ Մեզ մոտ ապրանքները հիմնականում բաց թողնման գնով են վաճառվում՝ ծխախոտը, երշիկեղենը։ Մենք շեշտը դնում ենք ոչ միայն ցածր գների, այլև բարձրակարգ և ջերմ սպասարկման վրա։ Ի ուրախություն մեր բոլոր հաճախորդների՝ մեր ցանցը շուտով կհամալրվի ևս 3 սուպերմարկետով»,- NEWS.am-ի հետ զրույցում ասաց «Նոր Զովք» սուպերմարկետի մենեջերներից Աննա Վարդանյանը (ֆոտոռեպորտաժ)։
Երևանում գործող մյուս սուպերմարկետների համեմատ Նոր Զովքի վաճառասրահները տարբերվում էին իրենց կոմպակտությամբ, սակայն վերջին շրջանում խանութների սկսել է փոխել իր մոտեցումը տարածքի հարցում:
Նորաբաց խանութ-սրահ զբաղեցնում է շուրջ 1200 քառակուսի մետր տարածք։ Առաջին հարկում սննդամթերքի բաժինն է, այստեղ գործում է նաեւ թոնրատուն, տարադրամի փոխանակման կետ։ Տնտեսական ապրանքների բաժինն ու դեղատունը երկրորդ հարկում են։
«Խանութների տարածքի հարցում, ըստ էության, ռազմավարության փոփոխություն չկա, պարզապես մենք շարժվում ենք շուկայի պահանջի համաձայն: Իսկ շուկան պահանջում է, որ անհրաժեշտ է ավելի մեծ տարածքով վաճառակետեր բացել: Դա անհրաժեշտ է, որպեսզի օրինակ տեղում գործի հացաբուլկեղենի արտադրամասը, կամ թոնրատունը»,- ասաց Նոր Զովք խանութների ցանցի մարկետինգի մենեջեր Ռազմիկ Թումասյանը՝ ավելացնելով, որ առաջիկայում բացվող խանութների տարածքները նույնպես համեմատաբար մեծ են լինելու:
Նորաբաց խանութի առաջին հաճախորդները գոհունակությամբ ընդգծում էին խանութի ընդարձակության և ներկայացված ապրանքների լայն տեսականու առավելությունը: Բանն այն է, որ նշված հասցեին մոտ որևէ մեծ խանութ չի գործում, և տարածքի բնակիչները մեծ ոգևորությամբ էին այցելում իրենց թաղամասի նորաբաց վաճառասրահ:
Նշենք, որ Նոր Զովքում 60 նոր աշխատատեղ է բացվել, ու աշխատողները հիմնականում ընտրվել են տարածքի բնակիչներից: