Արմավիրի մարզպետի խորհրդական Մանուկ Սիմոնյանի սպանության գործով մեղադրյալ կնոջն այսօր՝ օգոստոսի 22-ին, «Աբովյան» ՔԿՀ-ից տեղափոխել են «Նուբարաշենի» հոգեբուժարան: Այս մասին NEWS.am-ի հետ զրույցում ասաց Ռուզաննա Մկրտչյանի շահերի պաշտպան Նաիրա Պետրոսյանը: Նա նշեց, որ իր պաշտպանյալը հոգեբուժարանում կմնա այնքան ժամանակ, մինչեւ ստացվի դատահոգեբուժական եւ դատահոգեբանական համալիր փորձաքննության եզրակացությունը: Նաիրա Պետրոսյանի խոսքով, իր պաշտպանյալն ունի առողջական խնդիրներ եւ այս պահին նրա վիճակն այնքան էլ լավ չէ: Փաստաբանը չցանկացավ հայտնել իր պաշտպանյալի դիրքորոշումն առաջադրված մեղադրանքի վերաբերյալ՝ նշելով, որ նախաքննություն է ընթանում եւ չի ցանկանում այս պահին այլ մանրամասներ հայտնել:

Նշենք, որ Ռուզաննա Մկրտչյանի նկատմամաբ ստացիոնար դատահոգեբուժական եւ դատահոգեբանական համալիր փորձաքննություն է նշանակվել՝ պարզելու, թե Սիմոնյանի սպանության մեղադրանքով կալանքի տակ գտնվող նրա կինը հանցագործությունը կատարելու պահին եւ դրանից հետո ի՞նչ հոգեկան վիճակում է գտնվել:

Ավելի վաղ տեղեկացրել էինք, որ 2017թ. հուլիսի 23-ին Արմավիրի մարզի բնակչուհուց ոստիկանությունում հաղորդում էր ստացվել առ այն, որ 2017թ. հուլիսի 22-ին՝ ժամը 22։00- 23:00-ի սահմաններում, ամուսինը՝ Մանուկ Սիմոնյանը, դուրս է եկել տնից եւ այլեւս չի վերադարձել: Կինը հայտնել էր, որ ամուսնուն տան բակից կանչել է մի տղամարդ, ինչից հետո նա դուրս է եկել տնից՝ եւ չի վերադարձել:

2017 թվականի հուլիսի 25-ին՝ ժամը 23.30-ի սահմանում, «Դալարիկի ձոր» կոչվող տարածքում, հայտնաբերվել էր 1965 թ. ծնված Մանուկ Սիմոնյանի դիակը՝ փաթաթված եւ կապկպված:

Սպանվածի կնոջը մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով՝ որպես խափանման միջոց ընտրելով կալանավորումը, իսկ որդուն արգելանքից ազատելու մասին որոշում է կայացվել:

Նախնական տեղեկություններով սպանության դրդապատճառն ընտանիքում անհաշտ հարաբերություններն են եղել: