Լրատվամիջոցները շատ քիչ ուշադրություն են դարձնում Իրաքի եզդիների խնդրին: Այս մասին հայտարարել է քաղաքագետ Կարինե Գեւորգյանը՝ NEWS.am-ի թղթակցի հետ զրույցում մեկնաբանելով այն իրավիճակը, որում հայտնվել են Իրաքի եզդիները:
«Դրան շատ քիչ ուշադրություն է դարձվում՝ չնայած մարդասիրության տեսանկյունից հարցի կարեւորությանը»,-ասաց նա:
Միաժամանակ փորձագետը կարծիք հայտնեց, որ համաշխարհային հանրության ոչ բավարար ուշադրությունը եզդիների խնդրին պայմանավորված է տարբեր երկրներում, առաջին հերթին Եվրոպայի երկրներում եզդի համայնքի պասիվությամբ:
«Շատ վատ իրավիճակ է: Եվ համայնքի պառակտվածությունը, եւ միասնական պլանի բացակայությունը խանգարում են եզդի համայնքների ակտիվ գործողություններին»,-ասաց Կարինե Գեորգյանը: Որպես համայնքի պասիվության օրինակ նա բերեց այն հանգամանքը, որ եզդիների գլխավոր պաշտամունքային վայրը՝ Լալիշը, մինչ օրս ներառված չէ ՅՈՒՆԵՍԿՕ-ի ժառանգության ցանկում:
Հիշեցնենք, որ Իրաքում եզդիներով բնակեցված շրջանը 2014 թվականից գտնվում է ԻՊ-ի վերահսկողության տակ: Եզդիները պահանջում են ինքնավար Եզդիստան ստեղծել: