Վերջին շրջանում Ադրբեջանի թեման դարձել է իսրայելական լրատվամիջոցների նախասիրած թեմաներից մեկը: Իսրայելի եւ Ադրբեջանի հարաբերությունները նախկինում էլ են քննարկվել, սակայն Ադրբեջան Իսրայելի վարչապետ Բենիամին Նեթանյահուի այցին հետեւել է Բաքվի նկատմամբ մամուլի առանձնահատուկ հետաքրքրությունը, ոչ միշտ՝ դրական:
«Իսրայելական անխոնջ լրատվամիջոցները հաճախ են սխալվում իրենց մրցակիցներին տապալելու փորձեր կատարելիս»,- NEWS.am-ի հետ զրույցում նշեց Ադրբեջանում ԱՄՆ նախկին դեսպան, Ջորջ Մեյսոնի համալսարանի պրոֆեսոր Ռիչարդ Կոզլարիչը:
Բարձրակետը Maariv պարբերականի վերջին սկանդալային հոդվածն էր, որի համաձայն՝ Ադրբեջանը իսրայելական ընկերությանը խնդրել է հարվածային անօդաչուի հնարավորությունները կենդանի ցուցադրել հայ զինվորականների դեմ: Ավելին՝ Իսրայելի Պաշտպանության նախարարությունը հայտարարեց, որ այս տեղեկությունները ստուգում է:
Դիվանագիտական ծառայության ընթացքում Ռիչարդ Կոզլարիչը 3 տարի աշխատել է Թել Ավիվում ԱՄՆ դեսպանատանը՝ ղեկավարելով տնտեսական բաժինը: Նրա խոսքով՝ փորձը հուշում է, որ Իսրայելի Պաշտպանական բանակը հազվադեպ է հաստատում կամ հերքում մամուլի շահարկումները: «Նման հարցերում միակ հուսալի աղբյուրը Պաշտպանական բանակի մամուլի քարտուղարն է»,- կարծում է նախկին դիվանագետը:
Կոզլարիչը նաեւ նշեց, որ Ադրբեջանի նկատմամբ իսրայելական լրատվամիջոցների ուշադրությունը մի քանի գործոններով է պայմանավորված՝ առաջին հերթին Նեթանյահուի Բաքու այցի լայն լուսաբանմամբ: Չի կարելի անտեսել նաեւ այն փաստը, որ «Նեթանյահուի կոռումպացված վարքի մասին պնդումները կարող էին մամուլի հետաքրքրությունը հրահրել այդ կոռուպցիայի հնարավոր արտասահմանյան կապերի հանդեպ»: Վերջապես՝ իսրայելցի բլոգեր Ալեքսանդր Լապշինի դատավճիռը եւ ադրբեջանական բանտում ազատազրկելը մեծացրել է մեդիայի ուշադրությունը իսրայելա-ադրբեջանական հարաբերությունների նկատմամբ, ամփոփեց նա:
