Ավան եւ Նոր Նորք վարչական շրջանների ընդհանուր իրավասության դատարանում Արտուշ Գաբրիելյանը նիստերի դահլիճ հրավիրեց հեռացված երկու ամբաստանյալներին…
«Սասնա ծռերի» գործով հերթական դատական նիստին այսօր՝ օգոստոսի 30-ին, դատավոր Արտուշ Գաբրիելյանը հանրային պաշտպան ներգրավվեց՝ առանց ամբաստանյալ Արեգ Կյուրեղյանի եւ Սմբատ Բարսեղյանի համաձայնության:
Ավան եւ Նոր Նորք վարչական շրջանների ընդհանուր իրավասության դատարանում Արտուշ Գաբրիելյանը նիստերի դահլիճ հրավիրեց հեռացված երկու ամբաստանյալներին՝ նրանց դիրքորոշումն իմանալու համար: Չնայած Բարսեղյանն ու Կյուրեղյանը հստակ հայտարարեցին, որ հրաժարվում են հանրային պաշտպանից, Արտուշ Գաբրիելյանը որոշում կայացրեց երկրորդ հանրային պաշտպանը ներգրավվել: Հետաքրքիր է, որ Արմեն Բիլյանի դեպքում հանրային պաշտպան չներգրավվեց դատավորը, իսկ մյուս երկուսի դեպքում ներգրավվեց երկրորդ պաշտպանին:
«Ինչո՞ւ միասնական դիրքորոշում չունեք: Մի դեպքում որոշում եք չներգրավվել, իսկ մյուս դեպքում՝ ներգրավվում եք»,- Արտուշ Գաբրիելյանին դիմեց պաշտպան Լուսինե Սահակյանը:
Դատավորն անդրդվելի մնաց. ներգրավվեց երկրորդ հանրային պաշտպանին: Ներկա պաշտպանների մյուս հարցին՝ ինչու է որոշում կայացվել նույն ամբաստանյալի համար ներգրավվել երկրորդ հանրային պաշտպանին, Արտուշ Գաբրիելյանը բավականին ուշագրավ պատասխան տվեց. «Հաշվի առնելով Սմբատ Բարսեղյանի եւ Արեգ Կյուրեղյանի գործի բարդությունը՝ Հանրային պաշտպանի գրասենյակը որոշել է երկրորդ հանրային պաշտպանին ներգրավվել: Բացի դրանից, Արմինե Ֆանյանն աշխատանքային ծանրաբեռնվածության պատճառով կարող է չկարողանալ մասնակցել նիստերին»:
Լուսինե Սահակյանը հակադարձեց՝ Հանրային պաշտպանի գրասենյակն ինչ իրավունք ունի դատարանի փոխարեն նման որոշում կայացնել: Դատավոր Արտուշ Գաբրիելյանը շարունակեց ընթերցել որոշման տեքստը: Հանրային պաշտպան Գարեգին Մարգարյանը հայտարարեց, սակայն, որ ինքը պաշտպանություն իրականացնել չի կարող, քանի որ չունի ամբաստանյալների համաձայնությունը, սակայն նիստերին պարտադիր կներկայանա, որովհետեւ կա դատարանի որոշում: Արտուշ Գաբրիելյանը կրկին անդրդվելի մնաց՝ մեկ շաբաթ ժամանակ տալով Մարգարյանին ծանոթանալու գործի նյութերին:
Նշենք, որ նիստի մեկնարկին ամբաստանյալ Գագիկ Եղիազարյանը միջնորդեց նիստը հետաձգել, քանի որ իր պաշտպաններից եւ ոչ մեկը ներկա չէ: Դատավորը, առանց քննարկելու միջնորդությունը, նիստը շարունակեց, ավելի ուշ արդեն դատական սանկցիա կիրառեց Եղիազարյանի նկատմամբ եւ հեռացրեց դահլիճից՝ «ծիծաղելու համար»:
Դատական նիստը հետաձգվեց եւ նշանակվեց սեպտեմբերի 6-ին:
