«Սասնա ծռերի» գործով դատարանն ի սկզբանե որդեգրել է մի գործելաոճ, որ հեռացնի ամբաստանյալների պաշտպաններին եւ ներգրավի հանրային պաշտպաններ՝ այսպիսով իրականացնելով ֆիկտիվ պաշտպանություն։ Այս մասին այսօր՝ օգոստոսի 31-ին, դատական նիստից հետո լրագրողների հետ զրույցում ասել է գործով պաշտպան Ինեսսա Պետրոսյանը։
«Մեր պաշտպանյալները պետք է վերադարձվեն նիստերի դահլիճ եւ հնարավորություն պետք է ստեղծվի, որ մենք լինենք մեր պաշտպանյալների կողքին, այնպես չարվի, որ մենք չկարողանանք նրանց հիմնական պաշտպանությունն ապահովել։ Ամբողջ խնդիրն այն է, որ ի սկզբանե որդեգրվել էր մի գործելաոճ, որ հեռառացվեին ամբաստանյալների պաշտպանները եւ իրենց ընտրած պաշտպանները շարունակեին եւ կարողանային հանրային պաշտպանի գրասենյակի միջոցով ապահովել այդ ֆիկտիվ պաշտպանությունը ու արագ-արագ առաջ տանել գործը։ Այստեղ է խնդիրը»,-ասել է պաշտպանը։
Նրա գնահատմամբ՝ դատարանի այդ սցենարը խայտառակություն է, որը պետք է տապալել։
«Գտնում եմ, որ ամեն ինչ պետք է անել, որ այդ սցենարը չաշխատի։ Ուղղակի խայտառակություն է, որ այս իրավիճակում ոտնահարեն մարդու իրավունքները, դատախազները դատավորների հետ միասին թող ասեին՝ յուրաքանչյուր դատապարտյալը այսքան պետք է դատապարտվի ու ավարտեին գործը։ Նրանք ուղղակի քրեական դատավարութունից զատ են աշխատում»,-ասել է Ինեսսա Պետրոսյանը՝ հավելելով, որ այդ հարցը կփորձեն բարձրացնել Մարդու իրավունքների պաշտպանի գրասենյակի միջոցով։