Եվրոպայի խորհուրդը վճռական կամք ունի, որը կդրսեւորվի Խորհրդարանական վեհաժողովի աշնանային նստաշրջանի քվեարկության ժամանակ։ Այս մասին սեպտեմբերի 13-ին ԱԺ–ում լրագրողներին ասել է խորհրդարանի փոխխոսնակ Արփինե Հովհաննիսյանը։

Նրա խոսքով՝ ԵԽԽՎ աշնանային նստաշրջանի առաջին օրը՝ հոկտեմբերի 9-ին, նախատեսվում է քվեարկության դնել կառույցի գործող ղեկավար Պեդրո Ագրամունտին վստահություն հայտնելու հարցը։ Խորհրդարանի փոխխոսնակի խոսքով՝ մտավախություններ չկան, որ քվեարկության համար անհրաժեշտ 102 ձայները չեն հավաքվի։ «Այս ժամանակահատվածում Պեդրո Ագրամունտն իր վարքով իրականում ցույց է տվել, որ բացարձակապես չի հարգում ոչ մի արժեք, չի հարգում նաեւ Եվրոպայի ժողովրդական կուսակցության սեփական խմբակցությանը»,– նշեց Հովհաննիսյանը։

Նա նաեւ  հավելեց, որ հայկական պատվիրակությանը շատ դժվարությամբ է հաջողվել հասնել նրան ԵԺԿ–ից հեռացնելու մասին որոշման ընդունմանը։ «ԵԺԿ–ն նաեւ նրա հրաժարականն է պահանջում, բայց նա դա չի արել։ Հետեւաբար, ես չեմ խոսի այն մասին, որ նա հաշտվել է այդ որոշման հետ եւ այլ քայլեր չի ձեռնարկի»,– ասաց Արփինե Հովհաննիսյանը։