Հայաստան–ԵՄ համաձայնագիրը մինչեւ ստորագրման պահը չի հրապարակվի, եւ դրանում ոչ մի զարմանալի բան չկա։ Այս մասին սեպտեմբերի 14-ին հայտարարել է Հայաստանում ԵՄ պատվիրակության ղեկավար Պյոտր Սվիտալսկին՝«Հայաստանի մարզերում եվրոպական ակումբների» էսսեների մրցանակաբաշխության արարողության ժամանակ։
Նրա խոսքով՝ դա աշխատանքի սովորական կարգն է։ «Երբ ԵՄ–ն բանակցություններ է վարում երկկողմ համաձայնագրի շուրջ, այդ փաստաթղթերը մինչեւ ստորագրման պահը չեն հրապարակվում»,– նշել է Սվիտալսկին։
Նա հավելել է, որ տեքստը չի հրապարակվում որոշ պատճառներով։ «Առաջին հերթին՝ համաձայնագիրը նախագիծ է համարվում, քանի դեռ այն ստորագրված չէ։ Այն նախագիծ է համարվում անգամ, երբ նախաստորագրված է։ Երկրորդ պատճառն այն է, որ ընթանում է դիվանագիտական գործընթաց, որը պետք է գաղտնի մնա»,– նշեց Սվիտալսկին։
Նա կոչ արեց համբերել, իսկ բոլոր նրանց, ովքեր անհամբեր են, խորհուրդ տվեց կարդալ նմանատիպ այլ համաձայնագրերի բովանդակությունը։ «Իհարկե, դրանց բովանդակությունը տարբերվում է, բայց մեծ մասը նույնն է կամ նման։ Մենք ասել ենք, որ փաստաթուղթը, մասնավորապես դրա տնտեսական մասը, տարբերվելու է Ասոցացման մասին համաձայնագրից։ Դա ստանդարտ դիվանագիտական կարգ է։ Մենք պետք է փաստաթուղթը պահենք մեր սեղաններին եւ դարակներին մոտ, քանի դեռ այն չի ստորագրվել»,– ասաց Պյոտր Սվիտալսկին։