Իրաքի Քուրդիստանում պլանավորված հանրաքվեն կարող է արմատապես փոխել իրավիճակը տարածաշրջանում եւ աշխարհում։ Սեպտեմբերի 19-ին՝ մամուլի ասուլիսի ժամանակ, նման կարծիք է հայտնել քաղաքագետ Արման Նավասարդյանը։
«Սեպտեմբերի 25-ին Իրաքի քրդերը մտադիր են անկախության հանրաքվե անցկացնել։ Բայց ես կասեի, որ տարածաշրջանն արդեն 2006 թվականից անկախ է։ Դե ֆակտո անկախ է, բայց դե յուրե նման կարգավիճակ չունի»,– նշեց Նավասարդյանը՝ հավելելով, որ Քուրդիստանը կառավարման, կրթության, փեշմարգայի բանակի, որը թարգմանաբար նշանակում է «նայել մահվան աչքերին, լավ համակարգ ունի։ Փեշմարգայում 120 հազար մարդ կա զինված՝ հիմնականում ամերիկյան զենքով։ Միաժամանակ, ԱՄՆ–ը կտրականապես դեմ չէ Քուրդիստան պետության ստեղծմանը, քանի որ պլանավորվում է, որ այն տարածաշրջանում ԱՄՆ ֆորպոստ կդառնա»,- նշեց Նավասարդյանը՝ հիշեցնելով, որ Քուրդիստանի տարածքում 5.5 մլն մարդ է ապրում, այդ թվում՝ փոքր հայկական համայնք։
«Կա 4 քրդական անկլավ՝ Իրաքում, Թուրքիայում, Իրանում եւ Սիրիայում։ Նրանք դեմ են հանրաքվեին, քանի որ վախենում են դոմինոյի էֆեկտից։ Հատկապես Թուրքիան։ Քրդական պետության ստեղծումը՝ որպես Մեծ Քուրդիստանի հիմք, Թուրքիայի վերջի սկիզբը կդառնա»,– հիշեցրեց Նավասարդյանը։
Նրա խոսքով՝ կարեւորը Քիրքուքն է, որին հավակնում է Քուրդիստանը, եւ որը հարուստ է նավթով։ Թեպետ անցյալում Քիրքուքը լավ հարաբերությունների մեջ էր Թուրքիայի հետ։ Այնտեղից գնած նավթը վաճառում էին այլ երկրների։ Այսինքն՝ Թուրքիան տնտեսական վնաս կկրի։
