Այսօր թիվ մեկ խնդիրը պարտադրել Ադրբեջանին կատարել համանախագահների մասնակցությամբ Վիեննայի ու Սանկտ Պետերբուրգի հանդիպումներից հետո ընդունված պարտավորությունները, միայն դրանից հետո է կարելի է խոսել բանակցային գործընթացի փաստաթղթային քննարկումների մասին: Այս մասին այսօր՝ սեպտեմբերի 19-ին, Հայաստան-Սփյուռք համահայկական 6-րդ համաժողովի շրջանակում կազմակերպված «Արդի արտաքին մարտահրավերները եւ դրանց արձագանքման գործում Հայաստան-Սփյուռք համագործակցություն» թեմայով քննարկման ժամանակ ասաց ՀՀԿ փոխնախագահ, ԱԺ արտաքին հարաբերությունների հանձնաժողովի նախագահ Արմեն Աշոտյանը:
«Ադրբեջանական դիվանագիտությունը մի խորամանկություն է անում, իր ԱԳ նախարարի շուրթերով ասում է՝ Հայաստանը պետք է վերադառնա բովանդակային քննարկումների, իրենց համար բովանդակային ասելով այն է, ինչը որ հիմա Հայաստանում քննարկում ենք, ցավոք սրտի»,-ասաց նա:
Արմեն Աշոտյանի խոսքով, Արցախյան հիմնախնդիրը Հայաստանի հասարակա-քաղաքական օրակարգի կարևորագույն հիմնախնդիրներից մեկն է, մինչդեռ խորհրդարանական ընտրությունների ընթացքում ընդամենը 3 քաղաքական ուժ էր այն ներկայացրել իր նախընտրական ծրագրում. «ՀՀԿ-ն, ՀՅԴ-ն ու ՀԱԿ-ը, տարբեր տեսակետներով, բայց ընդամենը երեք ուժ է խոսել Լեռնային Ղարաբաղից, այո, խնդիրը արդիական է, բոլորս դրանով արթնանում ու քնում ենք, բայց քաղաքական օրակարգի նախընտրական թոհուբոհի մեջ դա խնդիր չի դիտարկված»:
