Վարչապետ Կարեն Կարապետյանն այսօր ընդունել է Լիբանանի զբոսաշրջության նախարար Ավետիս Կիտանյանին:
Վարչապետը կարեւորել է բարեկամ Լիբանանի հետ համագործակցության զարգացումը ոչ միայն զբոսաշրջության, այլ նաեւ տնտեսության տարբեր ոլորտներում: Փոխշահավետ գործակցության համար վարչապետը հեռանկարային է համարել մասնավորապես թեթեւ արդյունաբերության, գյուղատնտեսության, տեղեկատվական տեխնոլոգիաների, ոսկերչության ոլորտները: Կարեն Կարապետյանը անդրադարձել է նաեւ հաջորդ տարի աշնանը նախատեսվելիք տնտեսական եւ ներդրումային խոշոր համաժողովին՝ կարեւորելով լիբանանցի գործարար շրջանակների ներկայացուցիչների մասնակցությունը: Նա ընդգծել է, որ ՀՀ կառավարությունը պատրաստ է առարկայական կերպով քննարկել տարբեր ներդրումային ծրագրեր՝ դրանք հաջողությամբ կյանքի կոչելու համար:
Ավետիս Կիտանյանն իր հերթին գոհունակությամբ նշել է, որ լիբանանցի զբոսաշրջիկների կողմից բավականին մեծ հետաքրքրություն կա Հայաստանի նկատմամբ, եւ իրենց նպատակն է առաջիկայում կրկնապատկել զբոսաշրջային այցելությունների թիվը: Նախարարն ընդգծել է, որ ՀՀ տնտեսական զարգացման եւ ներդրումների նախարարության հետ պայմանավորվել են իրականացնել մի շարք թիրախային միջոցառումներ, որոնք նոր թափ կհաղորդեն զբոսաշրջության ոլորտում փոխգործակցությանը: Գալիք տարի նախատեսվելիք համաժողովը նա համարել է Հայաստանի ներդրումային հնարավորություններին տեղում ծանոթանալու լավ հնարավորություն եւ պատրաստակամություն է հայտնել լիբանանյան կողմին մանրամասն ներկայացնել ՀՀ կառավարության նախաձեռնությունների մասին:
