Արեւմտյան Հայաստանի տարածքում Քուրդիստանի ստեղծումն այս պահին անիրատեսական է թվում։ Այս մասին NEWS.am –ի թղթակցի հետ զրույցում ասել է թուրք- քրդական հակամարտության հարցերով մասնագետ Կարեն Հովհաննիսյանը։
Նա հնարավոր չի համարում այսպես կոչված «Մեծ Քուրդիստանի» ձեւավորումը։ «Առնվազն մոտ ապագայում ես նման բան չեմ կանխատեսում։ Իհարկե, Թուրքիայում քրդերը ակտիվ պայքարւոմ են սեփական ինքնավարություն ստեղծելու համար։ Փաստացի Սիրիայի տարածքում արդեն կա քրդական ինքնավարություն՝ Ռոժավան, որտեղ այս օրերին ընտրություններ են անցկացվում։ Ի դեպ, Ռոժավան աջակցություն է հայտնել Իրաքի Քուրդիստանին։ Այսինքն ստացվում է, որ Իրաքի, Սիրիայի քրդերն արդեն ունեն ինքնավարություն, իսկ Թուրքիայի քրդերը ձգտում են դրան»,- նշեց Կարեն Հովհաննիսյանը։ Թուրքիայի իշխանությունները, ինչպես եւ 2016-ի ամռանը, ռազմական ուժ կկիրառեն թե խաղաղ բնակչության, թե ապստամբած քրդերի դեմ։
