Հայաստանի անկախությունն ավարտվեց 1999-ի սեպտեմբերի 21-ին Վազգեն Սարգսյանի հպարտության արցունքներով եւ հոկտեմբերի 27-ին՝ այս դահլիճում նրա սպանությամբ: Այս մասին այսօր՝ հոկտեմբերի 3-ին, Ազգային Ժողովում իր ելույթում նշեց ընդդիմադիր «Ելք» խմբակցության կողմից ներկայացված ԵՏՄ-ից դուրս գալու համար ժամանակավոր հանձնաժողով ստեղծելու հարցի քննարկման ժամանակ «Ելք» խմբակցության պատգամավոր Արամ Սարգսյանը:
«Այսօր կարող եք փառաբանել աշխարհի եվրասիական հատվածը, որտեղ երկրային դրախտ է, որի դուռը գիշերային որոշումով բացվեց Հայաստանի առաջ: Ձեզանից մեկը կասի՞, թե քանի երեխա չի ծնվել, քանի որ տան տղամարդը մեկնել է արտագնա աշխատանքի, քանի՞ կին է ստիպված տղամարդ դարձել, քանի տան դուռ է փակվել: մենք ուզում ենք, որ հայը մնա Հայաստանում, այստեղ աշխատանք ունենա, ուզում ենք արդյունաբերություն վերականգնել, գյուղատնտեսությունը լոլիկի ու ծիրանի գերի չդարձնել: Մեր անկախությունն ավարտվեց 1999-ի սեպտեմբերի 21-ին եղբորս հպարտության արցունքներով եւ հոկտեմբերի 27-ին այս դահլիճում նրա սպանությամբ: Դրանից հետո ձեր կարգախոսը եղել է՝ «Ամեն ինչ իշխանության դիմաց» կարգախոսով»,-ասաց նա:
Հիշեցնենք, որ ԱԺ մշտական հանձնաժողովը դրական եզրակացություն չէր տվել նախագծին, այն արտահերթ է քննարկվում խորհրդարանում:
«Ելք»-ն առաջարկում է ԵՏՄ-ից դուրս գալու հարցը քննարկելու համար խորհրդարանում ստեղծել ժամանակավոր հանձնաժողով, որը հնարավորություն կունենա հարցն ուսումնասիրել 2 ամիս:
