«Սլավմեդ» բժշկական կենտրոնում ծննդկան Տաթեւ Գասպարյանի մահվան գործով 3-րդ դատական նիստն է անընդմեջ հետաձգվում:
Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հոկտեմբերի 3-ին դատավոր Աննա Մաթեւոսյանը հայտարարեց, որ ամբաստանյալներից Լիանա Դաղբաշյանի պաշտպան Վահրամ Մարգարյանից գրություն են ստացել, որ բուժման նպատակով գտնվում է արտերկրում:
«Երկրորդ նիստն է անընդմեջ, որ Վահրամ Մարգարյանը չի ներկայանում դատական նիստին»,- ասաց Աննա Մաթեւոսյանը՝ հավելելով, որ երրորդ անընդմեջ չներկայանալու դեպքում ամբաստանյալը պետք է նոր պաշտպան ընտրի, հակառակ դեպքում դա կանի դատարանը:
Լիանա Դաղբաշյանը հայտարարեց, սակայն, որ իր պաշտպանից չի հրաժարվում:
Դատական նիստը հետաձգվեց եւ նշանակվեց հոկտեմբերի 26-ին:
Նշենք, որ այս գործով դատավարությունը պետք է մեկնարկեր օգոստոսի 31-ին, սակայն նիստերը չեն կայանում:
Հիշեցնենք, որ ծննդկան Տաթեւ Գասպարյանի գործով երկու ամբաստանյալ կա՝ «Սլավմեդ» բժշկական կենտրոնի բժիշկներ Լիանա Դաղբաշյանն ու Կարեն Բաղդասարյանը: Ըստ մեղադրական եզրակացության՝ մանկաբարձ-գինեկոլոգ Կարեն Բաղդասարյանը կեսարյան վիրահատության ենթարկված եւ հիվանդասենյակ տեղափոխված ծննդկան Տաթեւիկ Գասպարյանի բժշկական օգնությունը եւ սպասարկումը կազմակերպելու ժամանակ իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդ Տ․Գասպարյանի մահը։ Հղիությունը վարած եւ կեսարյան հատումն իրականացրած Լիանա Դաղբաշյանը նույնպես հետվիրահատական սրահ տեղափոխված ծննդկան Տաթեւիկ Գասպարյանի բժշկական օգնությունը եւ սպասարկումը կազմակերպելու ժամանակ իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի մահը։
«Սլավմեդ» բժշկական կենտրոնի բժիշկներին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: