Այն բանից հետո, երբ այդպես էլ իրեն կուսակցական չզգացած եւ անգամ ԲՀԿ կրծքանշան չփակցրած Արեւիկ Պետրոսյանը Ազգային ժողովի փոխնախագահի աթոռից իջավ եւ հանգրվանեց ՀՀ Սահմանադրական դատարանի ավելի ապահով ու ցմահ երաշխավորված աթոռին, «Բարգավաճ Հայաստան» կուսակցության համամասնական ցուցակի հերթականությամբ պատգամավոր պետք է դառնա դերասան Գուժ Մանուկյանը, գրում է օրաթերթը:
Ըստ թերթի տեղեկությունների, սակայն, սիրված դերասանը գերադասել է չգալ Ազգային ժողով: «Իսկ ԲՀԿ խմբակցությունը, որքան մեզ հաջողվեց ճշտել, կհամալրվի Հայրապետ Հայրապետյանով: Հիշեցնենք, որ Հայրապետյան եղբայրները «Հայաստան» հանրախանութի սեփականատերն է, բացի այդ` Ռ.Ք. ընտանիքի հետ միասին «Նոկիա» բջջային հեռախոսների ներկրողն են, «ԲՄՎ» ավտոմեքենաների ֆիրմայի պաշտոնական ներկայացուցիչը Հայաստանում, նրանց է պատկանում «Արարատ» հյուրանոցը: Նրանցն են նաեւ ձիարշավարանը, Դիլիջանի «Պարզ լիճ» հանգստյան գոտին, որը, ի դեպ, ահագին կարգի են բերել: Ի լրումն` հայրական ծննդավայրում` Գավառում, ունեն լճափին գտնվող հյուրանոց: Նրանց «հարստությունների» շարքում չմոռանանք նաեւ քավոր-սանիկային հարաբերությունները Ալեքսան Հարությունյանի հետ»,-գրում է թերթը: