Հայաստանը մասնակցել է Աֆղանստանում, Իրաքում եւ Կոսովոյում ՆԱՏՕ–ի գործողություններին, որտեղ հայկական սփյուռք չկա՝ ելնելով որոշ նպատակներից, որոնք կապ չունեն հանրապետության անվտանգության հետ։ Այս մասին հոկտեմբերի 4-ին լրագրողներին ասել է Հայաստանի պաշտպանության նախկին նախարար Վաղարշակ Հարությունյանը՝ պատասխանելով NEWS.am–ի հարցին, թե ինչու է Հայաստանն այդքան ակտիվ համագործակցում ՆԱՏՕ–ի խաղաղապահ գործողություններին, սակայն նման աջակցություն չի ցուցաբերել ՀԱՊԿ դաշնակից Ռուսաստանին Սիրիայում ռազմական գործողությունների ժամանակ, թեպետ այնտեղ հայկական համայնք է ապրում։
Փորձագետի խոսքով՝ Սիրիայում, ի տարբերություն Աֆղանստանի կամ Կոսովոյի, խաղաղապահ գործողություններ չեն իրականացվել։ «Դա Ռուսաստանի կամ Հայաստանի դեմ ագրեսիա չէ, որի դեպքում կարող են ուժի մեջ մտնել ՀԱՊԿ պայմանավորվածությունները։ Այսինքն՝ Սիրիայում պատերազմ է ընթանում, որը ՀԱՊԿ լիազորությունների մեջ չի մտնում»,– ասել է Վաղարշակ Հարությունյանը։
