Կապան քաղաքում շուտով կինոթատրոն կբացվի: Այն կբացվի քաղաքի ամենախոշոր առեւտրի կենտրոններից մեկում՝ «Կապան մոլ»-ում: Ներկայումս իրականացվում են կառուցման աշխատանքները:
«Կապանում կինոթատրոն գործել է խորհրդային տարիներին, իսկ նախորդ 25 տարիների ընթացքում բնակիչները կինոթատրոնում ֆիլմեր դիտելու հնարավորություն չեն ունեցել»,-լրագրողների հետ զրույցում ասաց Սյունիքի մարզպետ Վահե Հակոբյանը: Նա նշեց, որ շաբաթ-կիրակի օրերին սոցիալապես անապահով ընտանիքների համար կինոթատրոնը լինելու է անվճար:
Մարզպետի խոսքով՝ կինոթատրոնի բացումը միտված է հատկապես երիտասարդների առօրյան ավելի հետաքրքիր դարձնելուն: «Ցանկանում ենք մինչեւ Ամանոր կինոթատրոնը Կապանին նվեր մատուցել»,-նշեց Վահե Հակոբյանը: Մարզպետը նշեց, որ կինոթատրոնը հագեցած է լինելու միջազգային ստանդարտներին համապատասխանող գերմանական արտադրության կինոտեխնիկայով։
«Ձեռք են բերվել պայամանավորվածություններ մի շարք միջազգային կինոմատակարարների հետ, ինչը հնարավորություն կտա Կապանում ցուցադրել արտասահմանյան արտադրության լավագույն ֆիլմերը»,-ասաց նա:
Վահե Հակոբյանն ասաց, որ կինոթատրոնն ունենալու է նվազագույնը 10 աշխատող:
