Ի պատասխան կոռուպցիայի մասին մեղադրանքների՝ Եվրոպայի Խորհրդի Խորհրդարանական Վեհաժողովը (ԵԽԽՎ) միաձայն ընդունել է Վեհաժողովի անդամների վարքագծի վերանայված օրենսգիրքը, որպեսզի վերականգնի վստահությունն իր աշխատանքի նկատմամբ:
Պատվիրակները հավանություն են տվել Յան Լիդել Գրեյնժերի ի զեկույցին՝ նշելով, որ կոռուպցիայի վերաբերյալ վերջին պնդումները սպառնում են նրա հեղինակությանը «երկարաժամկետ վնաս հասցնել» եւ որ ապագայում կոռուպցիոն ռիսկերից խուսափելու համար անհրաժեշտ է «հուսալի եւ համաձայնեցված ամբողջական կառուցվածք»:
Նոր կանոնները նախատեսում են անդամների կողմից ենթադրյալ էթիկական խախտումների արագ եւ արդարացի ուսումնասիրություն, ներառյալ արտաքին աղբյուրների կողմից բացահայտված խախտումները, եւ կատարված խախտումների համար խստագույն պատիժների սահմանում:
Վեհաժողովի անդամները պարտավոր են իրենց պարտականությունների կատարման ընթացքում չխնդրել եւ չընդունել որեւէ վճար, փոխհատուցում կամ պարգեւատրում եւ յուրաքանչյուր նիստի բացման ընթացքում պետք է հայտնեն այս կամ այն շահերի մասին: Թափանցիկության բարձրացման համար հայտարարություններն այժմ պետք է տեղադրվեն համացանցում: Գոյություն ունեն նաեւ դրույթներ, որոնք ապահովում են, որ զեկուցողները եւ դիտորդները հայտնեն շահերի բոլոր բախումների մասին:
Նոր շրջանակները նախատեսում են նաեւ ավելի լուրջ սահմանափակումներ լոբբիստների համար, այդ թվում`«թափանցիկության ռեգիստրի» ստեղծում, ինչպես նաեւ այնպիսի քայլերի ձեռնարկում, որպեսզի նախկին անդամները, ովքեր զբաղվել են վճարովի խորհրդատվություններով, չօգտվեն հատուկ արտոնություններից: