«Անելիք Բանկը» թողարկել է պարտատոմսերի 5-րդ խմբաքանակը` $5 մլն ծավալով, 5,75% եկամտաբերությամբ, ձեռքբերման փաթեթը` սկսած 1000 դոլարից: Պարտատոմսի ժամկետը 2 տարի է, տոկոսները վճարվում են 6 ամիսը մեկ:
Հիշեցնենք` «Անելիք Բանկը» սկսել է պարտատոմսեր թողարկել 2016 թ. դեկտեմբերին եւ 10 ամսվա ընթացքում արդեն կատարել 3-ական թողարկումներ` դոլարային (ընդհանուր 15 միլիոն դոլար) եւ դրամային (1 միլիարդ դրամ) ծավալով, որոնք ամբողջությամբ բաշխվել են ժամկետից շուտ:
Ֆիզիկական անձինք, ովքեր ձեռք կբերեն պարտատոմսեր, կունենան հնարավորություն ստանալու վարկ ընդամենը +1 տոկոսային կետով:
« Արդեն հինգերորդ և Բանկի համար պարտատոմսերի այս հոբելյանական թողարկումը պայմանավորված է մեր հաճախորդների կողմից ցուցաբերված բարձր պահանջարկով և Բանկի հանդեպ մեծ վստահությամբ », - նշեց բանկի գլխավոր տնօրենի պաշտոնակատար, ֆինանսական տնօրեն Ռուբեն Մելիքյանը:
Իսկ բանկի ներդրումային եւ հատուկ ծրագրերի զարգացման վարչության պետ Կարեն Նալբանդյանը հիշեցրեց, որ Հայաստանում պարտատոմսերի նկատմամբ գործում են մի շարք արտոնություններ. նախքան պարտատոմսի ժամկետի լրանալը այն կարելի է ցանկացած պահի վաճառել բորսայում` առանց տոկոսային եկամուտ կորցնելու` ի տարբերություն ժամկետային ավանդի:
«Միեւնույն ժամանակ, պարտատոմսերն երաշխավորված են ճիշտ այնպես, ինչպես ավանդները», - ընդգծեց նա:
Իր հերթին, Nasdaq OMX Armenia ֆոնդային բորսայի փոխտնօրեն Կարեն Զաքարյանը նշեց, որ պարտատոմսեր կարող են գնել նաեւ ոչ ռեզիդենտ քաղաքացիներ ու ընկերություններ:
Իսկ թողարկման մարքեթ մեյքեր (շուկա ստեղծող), «Արմենբրոկ» ներդրումային ընկերության տնօրեն Արամ Կայֆաջյանը նշեց, որ շուկայում աճում է պարտատոմսերի ոչ միայն առաջնային, այլեւ երկրորդային առեւտուրը (վերավաճառքը): Գումարային թողարկումների ծավալը կազմել է շուրջ $150 մլն, որից շուկայում շրջանառվում է 20 մլն-ը: Այսինքն, աճում է պարտատոմսերը ձեռք բերելու հետաքրքրությունը ոչ միայն թողարկման պահին, այլեւ` հետագայում:
«Անելիք Բանկն» էլ շուկայի ամենաակտիվ թողարկողներից է` ծածկելով շուկայում շրջանառվող պարտատոմսերի 12%-ը:
«Մենք դրամային մեկ տրանշ ենք ունեցել, երեք դոլարային: Վերջիններս հիմնականում ձեռք են բերում ֆիզիկական անձինք, բայց ակտիվ էին նաեւ ընկերությունները: Ամեն տրանշին ունեցել ենք մոտավորապես հարյուրից ավելի գնորդ, այսինքն ձեռքբերումը չէին կենտոնացրել մի խումբ խոշոր գնորդներ: Սա մեզ ուրախացնում է` վկայելով, որ մեր նոր առաջարկները պահանջված են դառնում լայն հանրության շրջանում», - նշեց Մելիքյանը: