Եվրամիությունը Եվրոպական դատախազության ստեղծման վերաբերյալ վերջնական որոշում է կայացրել, որի շուրջ քննարկումները ընթանում էին վերջին մի քանի տարիների ընթացքում: ԵՄ 28 երկրներից 20-ի արդարադատության նախարարները նոր գերատեսչության ստեղծմանը կողմ են քվեարկել, որը 2020 թվականին Լյուքսեմբուրգում կսկսի աշխատաքները, հաղորդում է DW-ն:
Գերմանիայի նախարար Հայկո Մասայի խոսքով՝ որոշումը «մեծ քայլ է Եվրամիության ամրապնդման համար», որը ցույց է տալիս, որ «Եվրոպան աշխատում է»: ԵՄ արդարադատության հանձնակատար Վերա Յուրովան իր հերթին «Եվրամիության եւ նրա հարկատուների համար պատմական օր է» հայտարարել: Ըստ հաշվարկների՝ Եվրոպական դատախազության գործունեությունը տարին հարյուր միլիոնավոր եվրոներ է բերելու, իսկ դրա սպասարկման համար տարեկան նախատեսվում է ծախսել շուրջ 21 միլիոն եվրո:
Գերատեսչության ստեղծման գործում աշխատում են Գերմանիան եւ 19 այլ երկրներ: Նրանցից յուրաքանչյուրը դատախազությունում մեկ կամ ավելի դատախազ ներկայացնելու հնարավորություն կունենա: Ավելի ուշ, ԵՄ մյուս երկրները եւս կարող են միանալ դատախազության աշխատանքին:
