ԵՄ–ն Հյուսիսային Կորեայի դեմ նոր միակողմանի պատժամիջոցներ է սահմանել՝ նոր սահմանափակումներ դնելով նավթի առեւտրի, ֆինանսական գործարքների եւ համատեղ ձեռնարկություններ ստեղծելու վրա, ինչպես նաեւ այդ երկրի 3 պաշտոնյաների ու 6 կազմակերպությունների ընդգրկել է սեւ ցուցակում։ Այս մասին ասված է Հյուսիսային Կորեայի հարցով ԵՄ Խորհրդի ԱԳ նախարարների մակարդակով հրավիրված նիստի ավարտին ընդունած հայտարարության մեջ։ Պատժամիջոցներն ուժի մեջ են մտնում անհապաղ։
«Հաշվի առնելով Հյուսիսային Կորեայից բխող միջազգային խաղաղության եւ կայունության սպառնալիքը՝ նոր արգելող միջոցներ են ընդունվել Հյուսիսային Կորեայի վրա ճնշում գործադրելու նպատակով, որպեսզի վերջինս կատարի իր միջազգային պարտավորությունները։ Երեք ֆիզիկական անձ եւ 6 կազմակերպություն հայտնվել են սեւ ցուցակում»,– ասված է փաստաթղթում, փոխանցում է ՏԱՍՍ–ը։