Գեղարքունիքի մարզում, այսօր՝ հոկտեմբերի 18-ին, խոշոր ու ողբերգական ավտովթար է տեղի ունեցել. ժամը 01։20-ի սահմաններում 37-ամյա Արսեն Բալայանը իր վարած Mercedes մակնիշի 82 ՏN 888 համարանիշի ավտոմեքենայով «Հարսնաքար» ռեստորանային համալիրի մոտ դեպի Սեւան ընթանալիս դուրս է եկել ճանապարհի երթեւեկելի գոտուց, բախվել բետոնե արգելապատնեշներին եւ մոտ 120 մետր մի քանի պտույտ գլխիվայր շրջվելով՝ բախվել է «Հարսնաքար» ռեստորանային համալիրի ճաղավանդակներին։
Shamshyan.com-ի փոխանցմամբ, վարորդը, ում քաղաքացիներն ու Սեւանի շտապօգնության բժիշկները հայտնաբերել են մեքենայից դուրս, ծայրահեղ ծանր վիճակով տեղափոխել են Սեւանի հիվանդանոց, որտեղ, սակայն, գիտակցության չգալով՝ մահացել է։
Աղբյուրի տեղեկություններով՝ մահացած Արսեն Բալայանը աշխատում էր Վանաձորի պոլիկլինիկայում եւ ծննդատանը, իսկ այսօր Երեւանում պետք է տեղի ունենար նրա եղբոր աղջկա հարսանեկան արարողությունը։
Ավտոմեքենայի մոտ հայտնաբերվել է նաեւ ատրճանակ, որը քննիչի կողմից առգրավվել է։