Ժիրայր Սեֆիլյանի եւ մյուսների գործով արդեն մեկ տարուց ավելի կալանքի տակ գտնվող Ներսես Պողոսյանը շարունակում է սեպտեմբերի 29-ին սկսած անժամկետ հացադուլը: NEWS.am-ի հետ զրույցում այսօր՝ հոկտեմբերի 19-ին, Ներսես Պողոսյանի շահերի պաշտպան Արայիկ Պապիկյանը նշեց, որ պաշտպանյալին տեսակցել է երկու օր առաջ, նրա մոտ բազմաթիվ առողջական խնդիրներ կան, հյուծված է եւ տկար:
«Ստամոքսի, երիկամների, լյարդի, արյան ճնշման խնդիրներ ունի եւ դրանք բոլորը գլուխ են բարձրացրել, շատ հյուծված, տկար վիճակում է»,-ասաց նա:
Արայիկ Պապիկյանը նշեց, որ Ներսես Պողոսյանի հետ տեսակցության ժամանակ աշխատում է հետը շատ չխոսել, որպեսզի պաշտպանյալն ուժերը չվատնի. «Դատական պրոցեսի հետ կապված հարցեր ունենք քննարկելու, բայց աշխատում եմ, որ շատ չխոսի, որպեսզի ուժերը չվատնի: Հորդորել եմ հացադուլը դադարեցնել, բայց անօգուտ է»:
Ներսես Պողոսյանը հացադուլով պահանջում է Ժիրայր Սեֆիլյանի եւ մյուսների գործով դատավարության լիարժեք հրապարակայնություն, իրեն վիրավորած դատախազ Պետրոս Պետրոսյանի բացարկ եւ իր խափանման միջոց կալանքի փոփոխում:
Ներսես Պողոսյանն անժամկետ հացադուլ է սկսել Երեւանի Շենգավիթ վարչական շրջանի դատարանում տեղի ունեցած նիստից անմիջապես հետո: Նա հացադուլ սկսելու մասին հայտարարել է այն բանից հետո, երբ դատարանը մերժել է նրա խափանման միջոց կալանքը փոխելու վերաբերյալ իր պաշտպանի միջնորդությունը:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան:
