Կարագի միջազգային գներն իսկապես աճել են: Հոկտեմբերի 20-ին լրագրողների հետ հանդիպման ժամանակ այս մասին ասաց «Սպառողների խորհրդատվական կենտրոն» հասարակական կազմակերպության նախագահ Կարեն Չիլինգարյանը:

Ըստ որում, նրա խոսքով, դրանք զգալիորեն են բարձրացել:

«Եթե համեմատենք անցյալ տարվա հետ, ապա կարագը թանկացել է 80-100 տոկոսով: Հետաքրքիրն այն է, որ թանկացել է ոչ միայն ներմուծվող կարագը, այլ նաեւ տեղականը»,- նշեց փորձագետը՝ հավելելով, որ իր մեծ զարմանքն է հարուցել այն փաստը, որ տեղական արտադրողները չեն փորձում օգտվել ստեղծված իրավիճակից, մեծացնել արտադրության աճը եւ արտադրանքի այս տեսակի գները նվազեցնել՝ այսպիսով իրենց դիրքերն ամրապնդելով հայրենական շուկայում:

Միեւնույն ժամանակ Չիլինգարյանը նշեց, որ վերջին 2-3 ամսում Հայաստանից յուրաքանչյուր ամիս դուրս է բերվել 2000-3000 գլուխ խոշոր եղջերավոր անասուն: Փորձագետի կարծիքով՝ սա շատ մեծ եւ սարսափելի թիվ է այնպիսի փոքր երկրի համար, ինչպիսին Հայաստանն է, որտեղ գրանցվում է նաեւ մսի գների էական թանկացում:

Չիլինգարյանը հայտնեց, որ անսնագլխաքանակը հիմնականում Իրան եւ Կատար է տեղափոխվում: Դրանից բացի, մսի գնի վրա ազդել է նաեւ երաշտային ամառը, ինչի հետեւանքով անասնակերը թանկացել է:

Սակայն, փորձագետի հայտարարությամբ, մսի գնաճն այնքան զգալի չէ, ինչպես կարագինը, եւ կազմել է ընդամենը 10-15 տոկոս: Չիլինգարյանը չբացառեց, որ գները կշարունակեն աճել, ինչը, նրա խոսքով, բավականին տագնապահարույց է: