Ցավոք, Ժնեւում կայացած գագաթաժողովից հետո տարբեր շահարկումներ են հնչում Բաքվից, եւ զինադադարի խախտումները շփման գծում շարունակվում են: Այդ մասին այսօր՝ հոկտեմբերի 20-ին ասել է ՀՀ ԱԳ նախարար Էդվարդ Նալբանդյանը՝ Լեհաստանի արտգործնախարար Վիտոլդ Վաշչիկովսկու հետ բանակցություններից հետո։
«Ես Լեհաստանի արտգործնախարարին ներկայացրեցի միջազգային իրավունքի սկզբունքների՝ ուժի եւ ուժի սպառնալիքի չկիրառման, ժողովուրդների իրավահավասարության եւ ինքնորոշման ու տարածքային ամբողջականության հիման վրա, Լեռնային Ղարաբաղի հիմնախնդրի կարգավորման առաջմղման ուղղությամբ Հայաստանի եւ Մինսկի խմբի համանախագահ երկրների կողմից գործադրվող համատեղ ջանքերը»,- նշել է նախարարը:
«Ցավոք, Ժնեւում կայացած գագաթաժողովից հետո տարբեր շահարկումներ են հնչում Բաքվից, եւ զինադադարի խախտումները շփման գծում շարունակվում են, ինչի հետեւանքով զինվոր է զոհվել երեկ։
Մենք համակարծիք ենք Լեհաստանի արտգործնախարարի հետ, որ միջազգային իրավունքի սկզբունքների վրա հիմնված ղարաբաղյան հիմնախնդրի բացառապես խաղաղ կարգավորմանն այլընտրանք չկա»,- ասել է Նալբանդյանը։
