Սյունիքի մարզում հոկտեմբերի 17-ին վթարի հետեւանքով Կապան բժշկական կենտրոն տեղափոխված 4 երիտասարդներն արդեն առողջացել են, նրանք օրերս դուրս կգրրվեն հիվանդանոցից: Այս մասին NEWS.am-ին հայտնեցին Կապան բժշկական կենտրոնից:
Կապան բժշկական կենտրոնի տնօրեն Կարեն Մելքոնյանը հայտնել էր, որ երիտասարդները ունեն կոտրվածքներ, սալջարդեր, սակայն, նրանց կյանքին վտանգ չի սպառնում:
Ավելի վաղ տեղեկացրել էինք, որ Սիսիան քաղաքի բնակիչ 22-ամյա Հ. Պողոսյանը Երեւան-Մեղրի ավտոճանապարհին իր վարած Mitsubishi ավտոմեքենայով դուրս է եկել ճանապարհի երթեւեկելի գոտուց, բախվել ապառաժ քարերին եւ կողաշրջվել:
Վթարի հետեւանքով վարորդը, նրա ուղեւորներ՝ Կապանի բնակիչներ, 21-ամյա Գ. Սարգսյանը, 25-ամյա Ա. Մարտիրոսյանը եւ Արցախի Հանրապետության Քաշաթաղի վարչական շրջանի բնակիչ, 21-ամյա Հ. Հովհաննիսյանը մարմնական վնաասվածքներով տեղափոխվել են Կապանի բժշկական կենտրոն: Վիրավորներին առաջինը օգնության են հասել քաղաքացիները, իսկ երկուսին, ըստ հիվանդանոցից հայտնած տեղեկությունների՝ ավտոմեքենայից դուրս են բերել Արտակարգ իրավիճակների նախարարության փրկարար ծառայության Կապանի հրշեջ-փրկարարները: