Արմավիր քաղաքում հոկտեմբերի 22-ին հրդեհի հետեւանքով այրված բնակելի երկհարկանի շենքում ապրող 10 ընտանիք այս պահին հարեւանների եւ հարազատների տանն են: Այս մասին այսօր՝ հոկտեմբերի 23-ին, NEWS.am-ի հետ զրույցում ասաց Արմավիրի փոխքաղաքապետ Մելիք Բաղդասարյանը: Նա նշեց, որ շենքում բնակվելիս է եղել 23 քաղաքացի, բարեբախտաբար, առաջացած հրդեհի հետեւանքով տուժածներ չկան: Նա նշեց, որ արտահերթ նիստ է եղել եւ Արմավիրի մարզի մարզպետարանում, եւ Արմավիր քաղաքի քաղաքապետարանում. որոշվել է բնակարանները կորցրած քաղաքացիներին տրամադրել առաջին անհրաժեշության պարագաներ՝ յուրաքանչյուր ընտանիքի 60 հազար դրամի չափով: Այս պահին նաեւ քայլեր են ձեռնարկվում անօթեւան դարձած 10 ընտանիքի տուն տրամադրելու համար:
Մելիք Բաղդասարյանի խոսքով, այս պահի դրությամբ հրդեհն ամբողջությամբ հանգցված է, սակայն, հերթապահություն են իրականացնում փրկարարները: Թե հրդեհն ինչից է առաջացել, դեռ պարզ չէ, արդյոք շենքը վթարային է եղել, փոխքաղաքապետը նշեց. «Այն Արմավիր քաղաքի սեփականություն չի հանդիսանում, պատկանում է ՓԲԸ-ի եւ այդ մասով չեմ կարող մեկնաբանություն տալ»:
Ավելի վաղ տեղեկացրել էինք, որ Արմավիր քաղաքում բնակելի երկհարկանի շենքում հրդեհ է բռնկվել, բնակիչները տարհանվել են:
