Եվրամիության հետ ստորագրվելիք նոր համաձայնագրով Հայաստանը կարեւոր քայլ կանի ԵՄ-ի, այդ թվում՝ Շվեդիայի հետ հարաբերությունների խորացման համար։ Այս մասին NEWS.am-ի հետ զրույցում ասել է Երեւանում Շվեդիայի դեսպանատան գործերի հավատարմատար Մարտին Ֆրեդրիկսոնը։ Նրա խոսքով՝ համաձայնագիրը նոր հնարավորություններ կստեղծի տարբեր ոլորտներում համագործակցության համար։
Հենց Շվեդիայի եւ Լեհաստանի ԱԳ նախարարներն են դեռ 2008-ին ներկայացրել Արեւելյան գործընկերության ծրագրի գաղափարը։ Նոյեմբերի 24-ին կայանալիք «Արեւելյան գործընկերության» գագաթնաժողովը հատուկ նշանակություն ունի Հայաստանի համար, քանի որ երկիրը ԵՄ-ի հետ նոր համաձայնագիր կստորագրի։
«2009 թվականին «Արեւելյան գործընկերության» գործարկման պահից ի վեր՝ մենք տեսել ենք, թե ինչպես են զարգանում ԵՄ-ի եւ նրա 6 արեւելյան հարեւանների միջեւ գործընկերությունն ու հարաբերությունները։ Բրյուսելի գագաթնաժողովն ընդգծում է կարեւորությունը, որը մենք տալիս ենք այդ ծրագրի շարունակությանը եւ հիշեցնում է նախքան այդ պահն ունեցած ձեռքբերումները»,- ասել է Ֆրեդրիկսոնը։
Նա ընդգծել է, որ վերջին հաշվով «Արեւելյան գործընկերությունը» ստեղծվել է մարդկանց եւ առօրյա կյանքի հեշտացման համար, եւ ԵՄ-ն նախկինի պես հավատարիմ է տարածաշրջանում ժամանակակից կայուն եւ բարգավաճող երկրների զարգացմանը ժողովրդավարական եւ թափանցիկ ինստիտուտների ու օրենքի գերակայության ամրացման, ինչպես նաեւ առեւտրի եւ տնտեսական զարգացման աջակցության միջոցով։ «Ծրագրի նպատակն է հենց գործընկեր երկրների քաղաքական եւ տնտեսական ասոցացման ու ԵՄ-ին տնտեսական ինտեգրման աջակցությունը։ Այն երկարաժամկետ հեռանկարում բարգավաճման եւ անվտանգության առումով օգուտ կբերի եվրոպական աշխարհամասում ապրող մարդկանց համար»,- ասել է դիվանագետը։
Ինչ վերաբերում է Հայաստանի եւ Շվեդիայի միջեւ հարաբերությունների զարգացման շահերին, դիվանագետը վստահ է, որ Հայաստանի եւ Շվեդիայի իշխանություններն ու կազմակերպությունները ավելի հեշտ կկարողանան փորձ փոխանակել, իսկ հայկական բիզնեսի համար նոր համաձայնագիրը կօգնի ներգրավվել եվրոպական ներքին շուկա։ «Ստորագրումն իրենով կարեւոր է, սակայն, իհարկե, մենք բոլոր առավելությունները կտեսնենք այն ժամանակ, երբ իրականացնենք համաձայնագիրը»,- հավելել է նա։
«Արւեւելյան գործընկերության» գագաթնաժողովն ընթանում է շատ խնդիրների ֆոնին, որոնց ԵՄ-ն բախվում է այս պահին։ Ոմանք կասկածում են, որ «Արեւելյան գործընկերություն» ծրագիրն ապագա ունի գործող խնդիրների, օրինակ, Brexit-ի ֆոնին։
Պարոն Ֆրեդրիկսոնն ընդգծում է այդ ծրագրի կարեւորությունը, քանի որ նրա խոսքով՝ ավելի հեշտ է այդ խնդիրները հաղթահարել երկրների միջեւ գործընկերական հարաբերությունների ճանապարհով։
«Ինչպես ԵՄ-ի, այնպես էլ «Արեւելյան գործընկերության» հիմնական գաղափարն այն է, որ խնդիրների այն քանակը, որոնց մենք բախվում ենք ժամանակակից գլոբալիզացվող աշխարհում, անհնար է լուծել առանձին-առանձին երկրներով։ Մեզ գործընկերական հարաբերություններ են պետք, որպեսզի միմյանցից սովորենք եւ համատեղ լուծումներ գտնենք այդ խնդիրների համար։ Ինչ վերաբերում է Շվեդիային, մենք հաջողության ենք հասել մեր համագործակցության շնորհիվ ինչպես հարեւանների, այնպես էլ ԵՄ անդամ երկրների հետ։ Ես կարծում եմ, որ կարելի է ավելի շատ բան անել «Արեւե;յան գործընկերության» շրջանակներում, որպեսզի անդամ երկրներին խթանենք սովորել միմյանցից»,- ընդգծել է նա։