Հայկական կողմը շահագրգռված է գերմանական մոդելը Հայաստանի մասնագիտական կրթության եւ ուսուցման հաստատություններում ներդնելու ուղղությամբ: Այս մասին, Գերմանիայի Դաշնության երկրամասերի մշակույթի եւ լուսավորության նախարարների համաժողովի գլխավոր քարտուղար Ուդո Միխալիկիի գլխավորած պատվիրակության հետ հանդիպման ժամանակ նշել է ՀՀ ԿԳ նախարար Լեւոն Մկրտչյանը:
ԿԳՆ-իցNEWS.am-ին հայտնում են, այսօր՝ հոկտեմբերի 30-ին, ԳԴՀ պատվիրակության անդամները հանդիպում են ունեցել ՀՀ կրթության եւ գիտության նախարար Լեւոն Մկրտչյանի հետ: Նախարարի խոսքով` ԳԴՀ գլխավոր քարտուղարի այցը եւս մեկ հնարավորություն է` ճշգրտելու կրթության եւ գիտության ոլորտում երկու երկրների միջեւ համագործակցության ուղղությունները: Լեւոն Մկրտչյանը բարձր է գնահատել Գերմանիայի դաշնային մակարդակով պաշտոնյայի այցը Հայաստան` այն բնորոշելով «ամփոփիչ»:
Հայաստանն ավանդաբար համագործակցում է ԳԴՀ Սաքսոն Անհալթի եւ Բավարիայի երկրամասերի կրթության համակարգերի հետ եւ այս տարվա ընթացքում արդեն ՀՀ ԿԳ նախարարությունն ընդունել է այդ երկրամասերի կրթության նախարարներին: Լեւոն Մկրտչյանը կրթական համագործակցության ծրագրերից առանձնացրել է միջին մասնագիտական կրթության ոլորտում գերմանական փորձը՝ հատկապես դուալ կրթության կազմակերպման գործում:
Նախարարը նշել է, որ հայկական կողմը շահագրգռված է գերմանական մոդելը Հայաստանի ՄԿՈՒ հաստատություններում ներդնելու ուղղությամբ: Այս համատեքստում նա կարեւորել է վերանայել ԵՄ շրջանակներում իրականացվող ծրագրերի արդյունավետությունը. «Կարծում եմ ժամանակն է որ խորհրդատվություններից անցնենք մոդուլային ծրագրերի եւ որպես օրինակ վերցնենք գերմանական դուալ կրթության մոդելը»,-նշել է Լեւոն Մկտչյանը:
ԳԴՀ նախարարների համաժողովի գլխավոր քարտուղար Ուդո Միխալիկին իր հերթին նշել է, որ ինքը նախարարների հանձնաժողովի առաջին ներկայացուցիչն է, ով այցելում է Հայաստան եւ մեր երկիր է ժամանել համագործակցության ամրանդման եւ զարգացման ծրագրերով: Նա ընդգծել է, որ Գերմանիայի Սաքսոն Անհալթի դպրոցների դասագրքերում ներառված է հայոց ցեղասպանության մասին նյութը որպես կրթական ծրագրի բաղադրիչ:
ՀՀ կրթության եւ գիտության նախարարը, շնորհակալություն հայտնելով, գերմանական կողմին նման նախաձեռնության համար, տեղեկացրել է, որ եկող տարի նախատեսվող Հայոց ցեղասպանության գլոբալ համաժողովն անցկացվելու է «Կրթության դերը ցեղասպանության կանխարգելման գործում» խորագրի ներքո: Անդրադառնալով ՄԿՈՒ ոլորտի համագործակցությանը՝ ԳԴՀ պաշտոնյան տեղեկացրել է, որ դուալ կրթությունը Գերմանիայի կառավարությունը ներկայում մշակվող շրջանակային ուսուցման ծրագրի կարեւոր ուղղություններից է եւ այս հարցում գերմանական կողմը պատրաստակամ է աջակցել Հայաստանին: Հանդիպման ընթացքում գլխավոր քարտուղար Ուդո Միխալիկին անդրադարձել է Հայաստանում գերմաներեն լեզվի ամրապնդման եւ տարածման հարցերին: Ի պատասխան Լեւոն Մկրտչյանն ընդգծել է, որ մշակվել է «Հանրակրթական ծրագրեր իրականացնող ուսումնական հաստատություններում օտար լեզուների դասավանդման հայեցակարգը», որը նախատեսում է հիմնել նաեւ օտար լեզուների խորացված ուսուցմամբ դպրոցներ: Այն ենթադրում է ոչ միայն լեզվի ուսուցում, այլ տվյալ երկրի մշակույթի, գրականության, աշխարհագրության, պատմության հատուկ դասընթացներ եւ այս հարցում եւս ՀՀ ԿԳՆ-ն կարեւորում է գերմանական կողմի աջակցությունը: «Մենք ունենք տարածքներ, որտեղ ավանդաբար գերմաներեն են ուսուցանում: Պետք է կարողանանք այդ տարածքների դպրոցները պահպանել, ստեղծել գերմաներեն լեզվի դպրոցների ցանց եւ զարգացնել դրանք»,- նշել է ԿԳ նախարարը՝ միաժամանակ կարեւորելով Գյոթեի ինստիտուտի մշտական ներկայացուցչության հիմնումը Հայաստանում: Հանդիպման ընթացքում կողմերն անդրադարձել են նաեւ համագործակցությանն առնչվող մի շարք այլ հարցերի:
